二零五零年 – 我女神係暴徒: 第三十四章

今日真係過得好漫長…原來每堂迫自己對住班學生讀出一頁又一頁既世紀謊言係咁痛苦…我地手上本教科書究竟係邊條友寫嫁? 果條友唔去寫長篇小說真係曬料, 可以將一堆大話寫得咁連貫既?!
 
我將手上本教師用書翻去封底…「作者: 偉大領導人 出版: 中國教育部」, 我再拎起枱面其他書, 每本既出版資料都係一樣。竟然係偉大領導人親自寫書教育我地…真係謝主隆恩囉, 再過幾年會唔會寫中國已經統治宇宙嫁?
 
拖住疲累既身體踏出校園…我自從頭先係茶水間同迪儀密會之後, 一直都故意避開迪儀, 我根本都無從入手去幫迪輝, 真係無面目見佢…。我今晚真係要的起心肝再同老豆傾下。
 
企係屋企既大門外, 今晚我係門外聽到屋企入面仍然係無電視聲, 唔通今晚老豆又默默坐係大廳梳化度等我?! 我拉開大門…咦?! 連燈都無開啵…老豆唔係咁大整蠱唔開燈唔開電視坐係梳化度扮鬼嚇我呱?!
 
「啪!」燈制打開, 咦?! 屋企無人啵…老豆明明係正宗廢老宅男, 好少出街, 今日竟然天黑都未番黎? 唔係又去左同班舊伙計北上食果個海底既唔知乜野撈下話?!
 


老豆好少夜晚唔係屋企, 出左去又無同我講聲, 我自己煮個麵食完之後係大廳睇電視, 最近唔知點解電視不停推銷珠海市既淡水魚生, 話食完會長命百歲, 呢幾日同老豆咁多爭呦, 我似乎要買多D淡水魚生比老豆食, 孝順番佢。
 
望住不停重播既魚生廣告…望一望個鐘, 都就黎十一點。突然間大門傳黎開門聲, 似乎老豆終於番黎, 我由梳化企起身行去大門迎接佢。
 
「老豆…你番黎啦! 今晚唔係屋企食飯都唔講聲…」
 
「阿熊! 你今日係學校又做乜野事! 係咪唔要命呀?? 你咁樣落去會死人嫁!」
 
我呆左一呆…今日學校乜野事? 唔要命?? 老豆又知道左今日既事…?? 校長唔係成功幫我處理左呢件事咩…?
 


「老豆…你…你…你又知道今日發生咩事…?」
 
老豆行埋黎我身前…雙手拍落我兩邊膊頭度…佢十隻手指握落我膊頭度握得好用力…
 
「今日武警總部阿李SIR又打比我, 我見到佢個來電顯示…已經心諗你可能又闖禍…阿熊呀! 你醒下啦! 我保唔到你咁多次嫁!」
 
李SIR係當年老豆個徒弟仔…全名好似叫李桂華…以前跟老豆係東九龍搵食, 我記得佢以前係三合會聯絡科, 負責管理三合會既資源去支援武警既行動, 三合會…印象中係武警既兄弟組織, 會時不時海陸空三方面配合武警執法。
 
老豆退休之前保薦左李SIR去總部情報科升職…李SIR間唔中都會過黎探下老豆, 因為佢都係住太古城隔離座。明顯地…而家李SIR做左老豆條針, 唔通老豆保薦李SIR去總部就係想佢監視我??