二零五零年 – 我女神係暴徒: 第二十四章

坐係港珠澳大橋既接駁巴士上面, 我呆呆咁望住黃昏夕陽既景色, 心入面不停回憶住過往幾日發生過既事。
 
迪儀係巴士入面默默咁坐係我身旁既座位上, 雖然佢合埋雙眼再隱約發出穩定既呼吸聲係度扮訓教, 但我知道迪儀只係唔想打擾我, 佢想比一個寧靜既時刻我去思考。
 
臨走之前, Felix 係我部電話度安裝左一個程式, 叫做「LIHKG」…奇怪既軟件名。佢好快咁輕輕教過我點用, 其實入到去就好似一個網上討論區, 但入面一隻中文字都搵唔到…每一個帖同回覆入面…都係由英文字組成, 但偏偏又並唔係英文黎。
 
Felix話呢個程式係透過位於澳門電腦房既伺服器去連接位於唔知乜野小島既主機去運行, 所以我地位於香港同澳門每日只會有幾分鐘時間可以連接上去…每當網絡開通都會有提示訊息。
 
Felix同我講…當時機成熟, 當需要動員大家企出黎既時候, 只要係呢個網上面發起, 大家都會回應你既聲音。
 


最後Felix 語重深長叫我自修一下粵語拼音…國語拼音我就滾瓜爛熟啦, 粵語都有得拼音? 唯有番到香港再百度一下。
 
帶住疲累、不安既心情再次經歷長達五小時既車程、過關、搜身、搜袋、搜電話、度高磅重、照X光、驗血、打指紋、家庭審查、入息審查、信用審查、背景審查, 呢D入境程序之後, 我拖住好勞累既身體番到香港市。
 
我踏入香港既入境大堂, 我望向天花板既閉路電視, 我相信同一時間, 老豆都已經收到消息我番到黎香港。
 
「熊主任, 你看上去仍然很疲累啊…你在車上面都沒小睡一下嗎?」
 
「沒有啊…你沒留意到我在想事情嗎?」
 


「啊…我都睡著了呢! 那你有想到什麼了嗎?」迪儀做戲做全套, 扮訓教都咁專業。
 
「我…要跟我爸談一談。迪儀你再等一下, 我會想辦法幫迪輝!」
 
「熊…」迪儀聽到我咁講之後呆左一呆, 好似想講乜野…但又欲言又止咁, 佢雙手放係胸前握實, 望住我點左一點頭。  「…謝謝你。」
 
由於番到黎香港已經入夜…迪儀又要趕去青衣既「主席碼頭」搭五星小輪番月娥島。而我就揮手截左一架的士, 啟程番去太古城。
 
番屋企既道路唔陌生, 但目的地既屋企本身就好似散發出一陣陣既陌生感覺。彷彿我對呢頭家既認識…呢三十年黎原來都只係知道得咁表面。
 


我細個從來都無問過老豆工作上既野, 只係知道佢每日收工都會帶住支槍同支警棍番屋企鎖入櫃桶, 陪我出街果陣都會將槍同棍帶住出去, 以前我覺得咁樣好型好威水。
 
我而家諗番起, 由細到大老豆都好少帶我去人多既地方, 亦每次佢隻手都拖得我好實, 話街上面非常危險。可能當一個人做得虧心事多, 自然就算未到半夜、無人敲門都會咁驚。
 
番到屋企門前, 我望住度大門, 雖然已經接近深夜十二點, 但我知道老豆一定坐係大廳果度等緊我。