二零五零年 – 我女神係暴徒: 第二十二章

大家都無回應我。咁又係既, 我憑乜野要佢地相信一個第一日認識既人呢? 重要係武警個仔…
 
迪儀行左埋我身邊, 拉住左我隻手。迪儀呢一刻望住我既眼神好平和。
 
「熊主任, 我們先回下面房間再說吧, 來!」
 
迪儀扶住Felix行出門口行去後樓梯方向, 我跟住佢地, 我唔敢再回頭望向其他人, 我好驚見到佢地原來係啤住我。
 
番到去下面果層既電腦室入面, Felix 搭住我膊頭。
 


「阿熊, 你唔好怪佢地, 係呢度既人甚至包括我, 佢地自己或家人都因為各種原因被武警迫害過, 而你爸爸曾經係鎮壓反抗分子入面既主要武警高層, 請你體諒佢地既心情。」
 
我點點頭。我明嫁, 望見Felix隻腳…佢塊面…迪輝既情況…加上影片入面各種暴力鎮壓場面…果數以十萬被失蹤既被捕者…我自己同一個雙手充滿鮮血既武警老豆住左幾十年, 我呢一刻都覺得心寒, 我每一日既生活…我屋企…我洗老豆既每一分錢…到底係用幾多條人命換番黎?
 
「Felix…我真係想幫迪輝…我想幫你地。」
 
「熊主任...謝謝你! 我和Felix都相信你的, 特別是今早看到你看著電腦螢幕時所流的眼淚, 我相信那都是發自內心的…」迪儀搭住我另一邊膊頭, 我意識到迪儀開始有意無意間都會抽下我水, 就黎可以叫飛雲準備。
 
「阿熊, 無錯! 我相信你前日係警署幫迪儀, 你內心係仍然有公義存在, 你本質係好人黎!」啊…其實我前日幫迪儀…唔係完全因為公義既…
 


「Felix, 我會努力嘗試由老豆方面著手睇下會唔會搵到武警方面既資源, 但咁樣就有一線生機救到香港咩? 我地點都係孤立無緩…一群被困係雀籠入面既雀仔, 點樣撞出去?」
 
「阿熊…我地並唔係你想像中咁孤立無緩, 你似乎一直相信左世界各國都係滅亡邊緣…中國先係世界唯一屹立不倒既強國? 我想比你睇一樣野!」
 
Felix 再次行去電腦前, 快速係界面輸入一堆指令碼。呢個時候有一個網絡瀏覽器打開左…點解唔係百度瀏覽器?? 呢個叫做…Google…Chrome?!
 
「阿熊, 我地穩守係澳門呢度係有原因, 澳門既網絡封鎖比較弱, 憑住我地一眾網絡工程師義士既努力, 我地可以係好短既限時入面, 短暫突破到國家既網絡封鎖連結到世界, 我地仍然同世界有聯繫!」
 
乜…外國網絡唔係爆炸左咩?? 外國重有網絡存在?!
 


Felix 入到去一個類似討論區入面…滿滿既英文字…我唔太睇得明堆英文寫緊乜野…我見佢開緊一個新既帖…標題係…「Spark Alliance Macau base 11/11/2050 Checking-in」…內文好簡短…「We are still here. Fight for Freedom, Stand with Hong Kong」, 帖既右下方…寫住IP address from: Macau。
 
「阿熊…你睇住啦。」
 
好快…畫面一直好多留言彈出黎…
 
「香港と共に, 自由のため, 日本は香港を支援する」IP address: Japan
 
「홍콩과 함께 걷고, 자유를 위해 한국은 홍콩을지지합니다」IP address: South Korea
 
「Marcher avec Hong Kong, pour la liberté, la France soutient Hong Kong」IP address: France
 
我唔知呢D外星文係度講乜野…但係留言跳得好快…不斷不斷彈出黎…短短幾分鐘, 留意數目已經破千。
 
直到我留意到一個留言…「光復香港, 時代革命」。