簡介
真人真事，我希望佢可以係紙言到見到呢篇文，知道我係等佢呢一年發生過嘅事，知道一年之後，我仍然係原處等待緊佢嘅回心，轉意。
等了一年...俾次機會我... 好嗎?【真人真事】【新手愛情故】
| 作者 | 老豆老母 |
|---|---|
| 類型 | 愛情 |
| 狀態 | 未完結 |
| 更新日期 | 26-04-2014 12:41 |
| 文章字數 | 1803 |
| 點擊次數 | 3555 |
我稱不上斯文，亦稱不上清純，不陽光，不魁梧，更不是帥哥。
有人話過，若一個男仔，又專一，又有錢，又靚仔嘅話，呢個男仔就會係圈中人。好笑嘅係，我三樣都唔係。
我唔似一般嘅雙子座，見十個先愛一個，每次我係學校嘅男性，只需要佢年不過三十，腰不過三十四，同班嘅話，我一概納入懷內，有時攬頭攬頸，過份啲嘅，就偷桃拖手，錫下面頰咁，唔同班嘅，我會刻意製造機會建立友誼，故作熱情親切，卻藏起自己對男性嘅獸慾，唔同級嘅，若係走廊相遇，迎面走過，我會故意偷偷點一點佢隻手，心裡暗自歡喜，男神嘅，我就會躲係一角，遠觀而不褻玩，感覺就好似若果我觸碰到佢我就係褻瀆神靈咁樣，甚為誇張。
我冇車冇樓冇名牌冇工人冇寵物，一家四口住係三百幾呎嘅瓦遮頭下。零用不過半千，為慳錢，我可以用三十分鐘由鰂魚涌經一條山路同一條長四百四十幾級嘅石梯翻學。晏晝個餐，一係唔食，一係捱公仔麵，麥記都捱唔起。
我只可以話，我有眼有口有耳有鼻，五官只可以以「正常」一詞形容之，膚色唔白皙，亦不健康，額頭上更生了幾粒雖小卻顯眼嘅青春痘，仲帶住一副戇戇地，又土土地嘅無框眼睛。好似由細到大，不論係家人，朋友，親戚，同學，從來冇人用過好嘅形容詞讚過我個樣，甚麼可愛，清秀，通通都冇試過用係我身上，更加唔好講話靚仔。
我做咗十六年人，都未找尋到自己嘅優點。講音樂？只係彈到一手爛琴，只可自娛而不可娛人。講讀書？讀理科嘅我，物理幾乎全炒，教我經濟個個miss都不時走嚟同我講：「不如你drop咗我個科啦。」似乎，唔係我想放棄讀書，而係讀書想放棄我。講運動？行兩步氣喘，跑兩步頭暈，所以，體育阿sir從來都冇當過我係男仔。我唯一嘅優點，係好捱得打。唔知點解，人地打我，我唔會縮，可能係反應慢得制，縮唔切，就因為咁，啲同學好中意打我。佢地可以上上下堂，無端端行過嚟，勁大力打我背脊。我唔會嗌痛，我唔會嗌唔好，唔係因為我享受俾人打，而係我覺得呢個係我唯一嘅優點。但係因為咁，我識多咗仔仔，佢地打我嘅時候我又可以抽下佢地水，唔錯，唔錯。
有鑑於我唔係靚仔嘅關係，我唔太中意上一啲交友網站去識圈中人。無上過交友網站嘅人可能唔明白，唔靚仔同上交友網有咩關係呢？係網絡世界，如果你唔靚仔同唔型仔，又或者你唔放相嘅話，識朋友，甚至係伴侶，都會無咁順利。有邊個識人第一件事唔係睇樣？話唔睇樣個啲就呃人嘅，係睇多定少姐，我話嘅。
但係人愈大，身邊放閃彈嘅人就愈嚟愈多，係一個pH值咁低嘅地方，自己就愈嚟愈想揾個伴，中和翻呢個咁酸嘅世界。但係，要知道嘅，係圈中人係好似黑夜中嘅貓，佢唔會話你知佢係圈中人，好好隱蔽自己，卻可能已經躲在角落偷偷的偷看住你，而你自己係懵然不知。但係一到日頭，佢地就會回復正常，有着正常嘅社交，正常嘅生活，根本就唔會分得到佢係圈中人與否，佢地亦唔會無端端行埋嚟同你講：「我係圈中人啊！」要係光明世界到揾一個圈中人，比大海撈針更難。唯一一個揾到圈中人嘅手法，而又唔會令大家尷尬嘅方法，就係上一啲隱蔽嘅同志交友網站。成個網都係同路人，又何需尷尬呢？
奈何，係網絡世界，識朋友，難，識知己，難，識伴侶，更難。試問，有邊個人判斷是否想同一個人做朋友，第一件事唔係睇樣？係交友網站放自己嘅相已經幾乎成為不明文嘅規定。雖然你絕對有權唔放相，但係要有人主動揾你就絕不係一件易，就算你主動揾人，人地亦可以選擇唔應你，甚至block你。呢個就係我唔中意上呢啲網站嘅原因。你可能問：「咁點解你唔中意放相？」可能係因為我唔中意影相，都可能係因為我有自知之明，唔願意獻醜，亦可能係因為我抗拒整假相，自欺欺人。
二零一二年嘅十二月，我第一次上Google搜尋：「香港同志交友網」。結果，我揾到TT1069。係我第一個識圈中人嘅地方，亦係最後一個我會上嘅交友網站。