《突然有條女同我同居》(冇甜): 77

「下一位。」不知不覺間，已經到咗最後幾位客人，時間都已經嚟到下午五點正。

喺我同愛盈嚟咗幫手之後，嚟排隊嘅人雖然多咗，但因為人手多咗，所以好快就已經冇乜客人。

喺最後一位客人都走埋之後，我哋嘅工作總算係正式咁完結咗。

「收工！」愛盈仍然充滿精神。

我行去愛盈隔離拖起佢隻手，喺佢耳仔隔離輕聲咁講：



「我哋繼續行埋佢，好冇？」

「嗯...」佢個身震咗一下之後，，塊臉紅紅地咁望住我。

正當我同愛盈諗住轉身離開嗰陣，身後傳嚟一把聲。

「喂前面嗰對夫妻～」係阿龍把聲。

「嗯？」我同愛盈同時轉身。



「呢度兩張抽獎券，係你哋幫手嘅謝禮，你哋一陣去阿峰嘅攤位到搵佢抽獎就得架喇！」佢塞咗兩張券俾我。

「多謝...」我將其中一張俾咗愛盈。   

收到禮物之後我哋就離開咗阿龍佢哋嘅攤位。

「你而家想去邊先？」我輕輕力咁撳一撳佢手掌。

「嗯...」



「不如我哋分頭買禮物俾對方，跟住最後一齊去抽獎呀？」愛盈有啲興奮咁提議。

「好，咁半個鐘後喺阿峰嘅攤位等。」我講完之後摸一摸佢個頭，當做獎勵。

「嗯!bye bye!」佢活潑咁出發去搵禮物。