《突然有條女同我同居》(冇甜): 73

一齊食完支甜筒之後，就已經差唔多十一點，所以我哋一齊上去同大叔約好咗嘅音樂室，一入到去，就見到大叔休閒咁坐咗喺窗邊嘅一張櫈上面㩒電話。

「咁早嘅！過嚟坐下先啦～一陣換件衫再練多次就要去後台準備喇。」，大叔放低電話，望向我哋講。

「呀～～～」，我一坐低咗之後，走廊外面就有把聲傳入嚟。

「嗶～嗶嗶嗶！」，哨子聲？

「剎車！到站！」，我好似估到係邊個喇...



「嗄...嗄...攞咗嚟喇王sir...」，馬尾同雙馬尾一邊喘氣一邊行入嚟放低一個紙箱。

「哦～唔該曬呀～一陣間請你哋飲嘢呀！」，大叔講完之後就行過去拎個箱過嚟。

「好！」，佢哋兩姊妹興奮咁回答。 

青春...

「咩嚟架？」，雲零好奇咁行過去個紙箱隔離等大叔打開。



「燈凳！」，大叔為佢打開個箱嘅動作配音，然後拎咗兩套衫出嚟。

「個箱淨係得兩套衫咩？明明我哋拎過嚟嗰陣有啲重架。」，馬尾姊妹提問。

「呵呵～淨低嘅嘢緊係唔會同你哋講啦，因為嗰個係壓軸嘅神秘大禮！」，大叔閂埋個箱自豪咁講。

「咁呢兩套衫係做咩？」，雲零問。

「一陣間你哋表演嗰陣要著嘅衫囉。」，大叔用理所當然嘅語氣回答，然後將兩套衫分別遞咗俾我同雲零。



「你哋而家換咗佢啦，我去個廁所先～」，大叔講完就出咗去。

「唔阻你哋喇～」，愛盈同嗰兩姊妹亦行出課室閂好道門。

成間課室突然淨返我同雲零兩個...

「嗯？原來係衛衣嚟？」，雲零拆開包裝拎咗件衫出嚟，係一件左邊灰色右邊暗藍色嘅有帽衛衣，左邊心口位清楚咁印咗「傑鳴」兩隻字。

佢望一望之後就放低件衫，然後開始解開自己件恤衫嘅鈕。

我見佢已經開始換衫，都跟住拎咗件衛衣出嚟，只見我嗰件同佢嘅顏色有啲唔同，我嗰件嘅設計係左邊黑色右邊白色，一樣印咗「傑鳴」兩隻字。

我除緊自己套校服嗰陣再望一望雲零，佢已經赤裸咗上半身準備笠件衛衣上去，然而我俾佢嘅上半身嚇咗一嚇。

佢嘅上半身，有住精練結實嘅肌肉，身材可謂完美，但令我嚇一跳嘅並唔係佢嘅身材，而係佢背部上...所佈滿住嘅一道道疤痕，其中大部分可以睇得出係受鞭打而成，有幾道甚至係刀疤。



我換好咗件衫之後，就忍唔住問佢：

「你背脊嗰啲...係點樣嚟？」

佢聽到之後，行嚟我隔離，挨住窗邊望天：

「我細個嗰陣比較瘦弱，所以成日俾人蝦。」，佢笑住咁講，被灰雲掩蓋住嘅天空，亦突然開始落雨。

其實由第一次見面我就已經發現咗，一直喺度偽裝緊，臉上成日掛住嘅笑容，總係帶住難以察覺到嘅憂傷，就好似隱藏緊一啲嘢咁，一直扮演緊一個角色，如果要問點解我會知嘅話，可能就係因為，喺某程度上，我都同佢一樣。

「你都...幾忍得。」，我望住窗外講。

「大家咁話。」，佢回答，雨勢亦變得越嚟越大。



「希望有一日可以見到真正嘅你。」，我望向佢講。

「咁...我而家俾少少嘢你睇先。」，佢講完之後，將隻手伸出窗外，攤開手掌。

「停。」，佢握拳講。

只見窗外嘅雨勢，慢慢變細...最後停埋。

「呢個係...」，我吞一吞口水。

「潛能，我都有。」，佢收返隻手返嚟，然後望向我講。

佢對眼頭先...好似變得淺色咗...