《突然有條女同我同居》(冇甜): 58

雖然今日嘅時間好似過得特別慢，但我始終都係成功咁捱到放學，今日對比起平時更加平淡無奇，而且休閒，甚至覺得無所事事，大概係習慣咗忙碌，無嘢做嘅時候反而會唔習慣。

我同愛盈準備離開學校果陣仍然落緊雨。

「呀...」，愛盈摸摸自己書包擺遮嘅位，然而咩都無。

「唔記得拎？」

「嗯...我而家上返去拎！」，佢一講完就打算跑上班房。



「唔洗喇，校工鎖咗門喇。」，我拉住佢個書包講，順勢將佢拉到我懷抱中 。

每次抱住佢，我嘅心情總會特別放鬆，而且唔想放開佢。

「你係咪特登唔拎走把遮...」，我淺笑道。

「邊有...」，佢個頭埋咗係我胸膛上，講嘢果陣有少少暖。

「但係你頭先臨走果陣特登望咗下個遮架喎。」，我以調戲佢嘅語調講。



「唔～～～」，佢怕醜咁用個頭頂我心口，呢個動作完全唔會痛，反而仲好幸福。

「不過無論你有無拎遮，我都要遮埋你。」，我本來就諗住咁做。

愛盈聽到之後抬起頭望住我，泛紅嘅臉頰加上清澈嘅雙眼同我對視，令我個心臟跳到差啲要跌出嚟。

「咳...兩位，雖然學校容許拍拖，但係呢啲嘢你哋不如返去先做啦好冇。」，校工突然出現係我哋隔離講道。

「...sorry。」，我尷尬咁講，然後拖住愛盈隻手開遮離開。



「好尷尬呀...下次唔好再係咁喇！」，愛盈大幅度咁搖擺我拖住佢嘅右手。

「睇心情。」

「哼！」，佢講完之後就提起我隻手，狠狠咁咬落去手臂到。

「痛...」，我用精湛嘅演技扮痛。

「真係咩...邊度痛？睇下？」，佢一臉擔心咁講。

...其實我一啲都唔怕痛。

「無嘢呀，傻。」，我淺笑道。

「唔～衰人！」，佢鼓起兩邊臉頰道。



「咁睇嚟黃愛盈好鍾意衰人。」，我繼續調戲佢。

「哼！我一定會報仇！」，佢扮嬲。

「咁我期待下。」，我笑住講。

...

「今晚食咩呀～？」，愛盈興奮咁走入廚房問我。

「麻醬烏冬。」，我一邊打開火腿嘅包裝袋一邊回答道。

「即係小賣部有賣果隻？」，佢側一側頭問。



「差唔多。」，我回想一下再答。

「咁...一定係你會整得好食啲！」，愛盈充滿自信咁講。

「點解？」，我記得小賣部果啲都幾好食。

「因為我老公煮嘢最好食！」，佢自豪咁講。

「...老公？咁快就想嫁俾我？」，我輕笑道。

「因...因為你咁樣整嘢食果陣真係好型，搞到我口快快就嗌咗老公...」，佢滿臉通紅咁望住地下解釋。

「仲心急過我喎。」，我一邊講一邊撈起啲烏冬。

「你快啲同我唔記得咗佢！」，佢塊臉仍然好紅。



「嗯...盡量。」

「一定要呀！」，佢講完之後就出返去坐低。

「記成世都得。」，我細細聲咁講。

不過...其實有時無嘢做都幾好。