《突然有條女同我同居》(冇甜): 52

...

只見眼前嘅紅衣少女以電光火石嘅速度用菜刀向我嘅頸部劈去！

...

已經天光...

呢個咩夢嚟....



「希希！嗚...」，愛盈突然攬實我，然後開始抽泣。

「做...做乜？」，我輕輕咁摸下佢個。

「嗚...有個女仔想殺咗我呀！差少少...少少咋！我爭啲就死喇！嗚...」

「傻瓜...夢嚟架咋嘛」，我拍拍佢個頭，安慰佢。

...等陣...



「你...夢入面果個女仔...著咩色衫？」

「紅色...」，佢一路捽眼一路講，睇嚟終於開始冷靜返。

不過我聽到之後反而打咗個冷震，應該係巧合啫...

之後我哋就去咗梳洗，準備返學。

係食緊早餐個陣，愛盈突然一臉驚訝咁望住電話螢幕，隻手仲要有少少震。



「做乜？」

「你睇下呢個...」

佢將電話轉向我嘅方向，只見佢原來睇緊連登。

畫面嘅最上方寫住：

緊急！有冇人琴晚發夢夢見一個紅色衫嘅女仔？！

見到呢個標題之後我吞一吞口水，然後繼續睇落去。

#2 雪姑七友七個小矮人
－紅衣少女...想隊冧我呀！



#3 爆肌大叔
－CLS我又係呀 佢拎把菜刀想劈9我呀！

#4 無汗費嚴
－我仲以為春夢嚟架...點知個夢咁真...

之後七百幾個留言大概都係差唔多意思。

「點...點算呀...」，愛盈緊張咁問我。

「唔緊要...可能係有一大部分人諗起啲恐怖嘢然後發啲夢嘅內容差唔多啫，今晚就正常返架喇。」

我用平穩嘅語氣同佢講，不過其實個心入面好驚訝同擔心...

邊有可能咁巧合...



不過我哋都係要乖乖地返學。

返到學校之後，只見大部分人都神情緊張，個個都好唔自在，感覺神不守舍咁，就連啲老師都係。

到班會嘅時候，個班主任凝重話有啲嘢宣佈，令全班乖乖地咁聽佢講。

「今日呢，有個插班生，大家要好好相處，err...佢而家應該係校務處度搞緊啲手續，一陣就上嚟架喇。」

「陳sir！男定女架？」，一位係班上比較活躍嘅男同學舉手問。

「阿sir係男，插班生係女」

「係咪靚女！」，果位男同學繼續問。



「你自己睇到咪知囉，不過我都有嘢要問你呀林繼傑！」

「係！咩事？」，林繼傑坐返直個人回答。

「你做乜著鴛鴦鞋返學呀！」

「吓...err，今朝出門口...err...太急，哈哈！」

「留堂！」

「咯咯！」，係佢哋結束咗愉快嘅對話嘅同時，一個女仔敲完門之後低住頭咁行入嚟，只見佢紮咗一條好長嘅馬尾。

「張同學，自我介紹下先啦。」

「係...」，佢隨即抬起頭。



...原來係佢。

「大...大家好，我叫張詩禮，英文名係Alice...你哋可以叫我愛麗絲...」，佢一路講一路用雙眼環視四周，最後目光停咗係我身上，臉帶微笑咁對我揮揮手。

有一半嘅同學見到佢呢個動作之後望咗我一眼，然後細細聲咁同隔離位討論，不過令我更在意嘅，係我右邊嘅殺氣...

「佢係邊個！」，愛盈鼓起兩邊臉頰，語氣好似好嬲睥住我講。

「佢...佢只係一位琴日嚟簽書會嘅女讀者...」，我吞一吞口水講。

「真係？」，佢靠近我，臉帶疑惑咁問。

「千真萬確！」

「信住你先...」，講完佢就坐返好，然後將目光放係愛麗絲身上。

最後愛麗絲坐咗係班房最右手邊嘅角落頭位。

...

同一時間，一位外表有點邪氣嘅男子手托下巴咁望向窗邊，自言自語咁講，

「呀...好煩呀～今晚又要去做嘢喇，拉齊～」

佢講完之後打咗個喊露，然後轉成伏係枱上面瞓覺。

...

轉眼間就到咗小息，然而一落堂我就聽到一個幾特別嘅消息。

「喂唔係呀嘛，你真係想同「紅眼惡魔」表白呀？聽講佢有女朋友架喇喎。」

「聽講啫～」

有兩個女仔係班房門口討論。

「紅眼惡魔」...

「憶奇！唔可以搞希希呀～」

...黃愛盈又伏係枱面瞓到成隻豬咁。

正當我諗住拍拍愛盈叫醒佢嘅時候，一個身影突然出現我前面。