《突然有條女同我同居》(冇甜): 41

我出到露台，閂好道門之後就見佢挨住欄杆望住月亮。

「今日係你生日，生日快樂」

「...嗯」

「我有啲嘢想送俾你....」

之後佢係佢衫袋入面拎咗個護身符出嚟，外貌同日本嘅御守一樣。



「呢個係你出世果陣，你阿爺交俾我，叫我係適當嘅時候俾你...我諗而家應該係適當嘅時候喇，見到你大個仔咗咁多。」

佢望住我講，係呢個時候，月光啱啱好映照到佢臉上，我發現...雖然佢個樣後生咗，但係佢嘅眼神...顯示出佢嘅寂寞同掛念。

有咁多年無遇到過真愛...而且我搬走咗，原来佢...一直都比我想像中辛苦。

呢啲時候我諗唔到啲咩安慰嘅說話，只係俾咗一個擁抱佢，因為比起再多嘅安慰說話，一個擁抱反而更溫暖。

「我以後多啲番嚟食飯」



「乖...」

之後我將護身符好好咁收好之後就出番廳，一齊傾咗陣閒計之後就番咗屋企，話說個衰仔送畀我嘅生日禮物竟然係張百佳五十蚊卷...佢話佢係贏咗個電競比賽攞番嚟...

所以我都同佢講咗句快高長大。

「做好安全措施呀！」

老母係我哋就之前仲不忘咁樣同我哋講。



出咗門口之後，愛盈就天真咁問我，

「auntie話咩安全措施呀？我哋晚晚都鎖好門架喎...」

我係佢耳邊細細聲咁解釋俾佢聽，聽完之後佢就紅都面晒。

「aun...auntie真係呀！」

佢好怕醜咁講。

好快我哋就上咗巴士，坐好咗之後我就拎個護身符出嚟認真咁睇一次，上面只係簡潔有力咁寫住一隻字－命

阿爺俾我嘅嘢...無記錯嘅話老母好似講過佢係我啱啱出世無幾耐就飛咗去台灣定居，因為我阿嫲係果個時候啱啱過身，究竟呢個護身符，有咩意思...