《突然有條女同我同居》(冇甜): 35

我望去聲音嘅方向來源，只見正正係我哋後面果張枱嘅位置，有一位大概十八十九歲嘅青少年獨自坐咗係度，果樣望落非常斯文，似係典型文青，佢左手拎住一本好厚嘅簿，而右手拎住一支黑色嘅鋼筆不斷咁寫嘢，望上去好似好集中咁，而且我頭先一直都無發現到呢個人，可見佢嘅動作有幾寧靜。

佢好快就注意到我嘅目光，然後用一個疑惑但又不失禮貌嘅眼神問我。

「請問...係咪有事？」

「無...無嘢，只不過你頭先突然講咗句嘢...令我有少少嚇親啫」，我感到無比尷尬。

「唔好意思...呢個係我嘅壞習慣嚟...你知啦...突然有靈感係興奮啲架啦」，佢苦笑道。



「都係嘅...」，我無奈咁點點頭。

「見你咁答，睇嚟你應該都有寫開故喎」，佢摸一摸下巴。

「係」

「不如我坐過去啦...咁樣講嘢其實有啲唔方便」，佢表情有啲尷尬。

講完之後佢就合埋本薄，然後搬張凳過嚟坐低咗。



「等我自我介紹先...我叫滿雲零，就嚟19歲，而家大一，係一個極無人氣嘅網絡小說作者。」

佢面帶微笑咁伸手，打算同我握手，我都無理由要拒絕佢，所以我亦都禮貌性咁伸咗隻手出嚟。

「我係葉正希，佢係黃愛盈，我女朋友，我哋今年中三，我一樣係無乜人知嘅網絡作者。」

「請問....你女朋友...有無家姐...?」

佢望住愛盈若有所思咁問。



「無喎....做乜咁問嘅？」，愛盈側一側頭問，好可愛...

「因為...你實在係同一個人好似...」

佢講嘅時候臉上閃過一絲悲傷，但佢好快就隱藏咗，轉移咗話題。

「係呢...你咪話你有寫故嘅...介唔介意講下你嘅筆名？」

「佢叫黑貓呀！你唔係唔識呀嘛？」，愛盈興奮又自豪咁講。

滿雲零滿臉驚奇咁望住我，

「...估唔到咁後生...」

點解咁多人識...明明好少人睇...



「咁你....?」

「我係直接叫雲零，不過同你嘅人氣簡直係小小巫見大巫呀」

小小巫...新潮語？

但係...雲零...好似睇過。

「我好似睇過...係咪叫做....《係籃球場俾個女仔撞倒》」

「黑貓先生你竟然睇過我嘅文！」

「果然，不過我覺得果個故其實寫得好好，文筆又唔錯，只係比人低估咗」



「我都係第一次受到咁嘅讚賞...係呢，你可唔可以幫我一個忙？」，佢眼神充滿誠懇咁問。