《突然有條女同我同居》(冇甜): 31

「我唔食蛋糕...所以唔會識整，你...你搵瑩瑩」

「好啦～我哋去整蛋糕lu～」

之後佢就拖就咗瑩瑩去廚房...好彩我唔使食....

佢哋兩個去入咗去開始一齊奮鬥之後，我哋三個無嘢做所以就傾下閒計，

峰：「喂你哋知唔知呀，最近啲「fam j」好出名喎」



龍：「係囉，佢哋啲料都好正，估唔到咁多人都咁假，其實佢哋咁樣都幾辛苦」

「咩係fam j」

峰：「吓你唔知咩，即係係IG上面有啲名氣果啲呀，佢哋通常會有一堆fd，成日周圍去玩影下相咁，不過啲朋友係唔係真心就唔知喇，因為我見佢哋成日都會爆其他人嘅料，好多八卦，不過都有唔少係好嘅，佢哋有啲都會對社會有貢獻嘅，雖然有啲例外嘅真係好黑人憎」

「呢個社會嘅原則就係咁，想出名就要有實力，並非淨係得把口，成功嘅人會受歡迎，失敗嘅人只會受到冷眼同埋抨擊，所以通常得個樣嘅都好快就會自動消失，所以唔好以貌取人，有陣時結局係可以好出乎意料，聽你講嘅例子就知，呢個社會其實仲係好極端，好無內涵」

龍：「好深奧...我唔係幾明...」



「總之有好多嘢，過一段時間就會露出原型，然後甚至不復存在」

峰：「其實我都仲係唔係好明，不如...我哋傾番籃球」

「無所謂，而家有幾多隊報咗？」

龍：「已經夠咗七十二隊，不過我硬係覺得唔係好對路，因為我見有好多隊個名都淨係得個no.」

「可能...實際上真正嘅參賽隊伍，會少好多。」



峰：「係喎，有無女架？」

「有你都溝唔到啦」

我同阿龍同時講咗呢句嘢出嚟，然後High－five。

同一時間，深山別墅內－

愛麗絲門都無敲就入咗老大間房，

「Daddy，我想打籃球！」

「果個比賽呀嘛，你一陣落地下室求其搵兩個人同你玩啦，記住比賽嘅時候盡量唔好用潛能呀。」

只見老大聚精會神咁望住佢果本全英嘅小說，但係唔知點解佢額頭係度冒汗。



「yeah～係喎daddy，你本書倒轉咗點睇呀？」

「我...我加深難度啫，本來就咁睇太容易呀嘛。」

「哦～真係好學。」

跟住愛麗絲就興奮咁帶住輕盈嘅步伐落去地下室。

愛麗絲走咗之後，老大終於可以安心咁睇佢最近十分沉迷嘅漫畫，XX之刃。

可惜...