《突然有條女同我同居》(冇甜): 21
「你...你做咩呀...」
扯起咗我件衫之後，佢就伸個頭去我個心口係咁聞我身上嘅氣味，我輕輕咁樣推開佢個頭，推開咗之後，佢望咗我幾秒，跟住就痴埋嚟好似狗仔咁樣係咁用條脷奶我塊面，佢一定係醉咗...而且成身都係酒味...佢塊面呢個時候已經紅到成個蘋果咁...
之後我再次輕輕力咁樣推開咗佢，令到佢坐番好先，然後再整翻好我自己件衫佢，但係坐番好十秒都冇，佢竟然諗住除咗佢件衫，當佢除到一半果陣，我攬住咗佢，一方面想停止佢嘅動作，另一方面想佢冷靜少少先，點知我一攬住咗佢，佢就開始係我心口前抽泣，
「其...其實你係咪覺得我唔夠吸引呀...點解...點解我已經主動咁同你一齊訓...你都係咩行動都冇...唔...唔通你對我咩興趣都冇...但係我明明聽過瑩瑩講過...男人好咸濕架嘛...我仲要跟住佢講嘅去做架喇...點解我咁努力都係無用呀！我係咪有咩做得唔啱呀！」
講完之後佢就喊得越嚟越勁，
「佢究竟又同你講咗啲咩呀...但係你真係傻瓜嚟嘅，女仔邊可以咁樣去令到自己失身架...同埋呢，你邊會唔夠吸引啫，我無時無刻都不知幾想食咗你啊，但係我唔可以咁樣做架，咁做咪無考慮到你感受囉，而且你明明一啲心理準備都冇，隻手明明已經震成咁喇，我如果咁衝動嘅話，大家做完之後都會後悔架傻豬，所以你以後都唔準咁衝動呀知道未？呢啲嘢要等情侶兩個人準備好咗先可以做架，知未？」
我講完之後佢點咗下頭，而且都無再喊，跟住我哋就繼續保持住呢個動作大概十分鐘，我摸一摸佢個頭之後講，
「好喇，都係時候訓覺喇。」
但係佢今次無回應到我，我望一望佢，原来一早已經訓著咗...跟住我為咗唔好整醒佢，所以我保持住一個好似抱住一隻樹熊嘅姿勢咁樣抱佢入房然後擺佢係床上面，再錫佢一啖，但係唔知點解我錫咗佢一啖之後佢竟然露出咗一個超甜嘅笑容，真係可愛...呢個笑容，我拼死都要守護...之後覆咗幾個讀者嘅DM之後我都訓咗。
...
係香港呢一個平靜嘅午夜，同時，係地球嘅另外一面。
美國洛杉磯，一間小士多入面，發生咗一單疑似係兇殺案嘅事件，死者係一位四十歲嘅男子，相信係該店嘅老闆，屍體上只有額頭上有一個子彈孔，而且現場閉路電視俾人破壞咗，而且店內所有現金都唔見晒，同埋搵到一把手槍，相信係犯人留低，所以在場警方認為呢件係一單持槍搶劫案。
當一位警察拍下罪證之後，佢發現本來係子彈孔入面嘅子彈竟然變咗一粒小石，而且手槍都變成咗一個空酒樽！見到呢一幕之後，不同於某地方嘅執法人員，佢哋認為呢單案件非常有可疑，絕對唔係正常人做到嘅嘢，所以在場嘅一位警官打咗一通電話。
同一時間，係洛杉磯機場嘅一個洗手間入面，一個亞洲男子掉咗咗一疊美金入馬桶，佢無沖到廁，而且直接離開咗廁所，因為佢要搭嘅航班已經可以上機，而果個航班嘅最終目的地係－香港－
航班出發咗半小時之後，美國洛杉磯機場發生咗一個小型爆炸，爆炸地點係一個廁所，相信當時如廁嘅人無一生還。
...
當我訓醒果陣，已經朝早八點，我極速咁起身整咗個簡簡單單嘅早餐，兩碗餐蛋麵加兩杯熱朱古力，整好咗早餐之後我就番房叫愛盈起身，佢捉住我隻手慢慢咁樣爬咗起身，
「呀～我個頭好痛呀...」
「緊係啦你琴晚醉成咁，今日要乖乖地係屋企休息呀，知未？」
「好啦...」
跟住佢就乖乖地入咗廁所刷牙，佢一係廁所出番嚟就話要希希能量（即係morning kiss），補充完能量之後，我哋就開始食早餐，食食下果陣，門鐘聲突然響起...
我去咗門口打開門一打開門就見到....
「surprise！！我上嚟睇下你個女朋友仔喇，放假嘅話你哋一定會黐埋一齊架啦！」，言姐興奮咁講。
「咁...好啦...你入嚟啦」
之後佢就除鞋入嚟，一入到嚟佢就見到憶奇係佢面前，諗都無諗就抱起咗佢，
「喵你個喵喵！你做乜喵嘢抱朕呀！」
跟住憶奇就極速咁離開咗佢嘅懷抱，然後兇狠咁啤咗佢一下，
「呀...佢最近心情有啲差...」
「哦～咁好啦，你女朋友呢？」
「佢食緊早餐，你跟我過嚟」
跟住我哋就去番飯枱果邊，
「hi～你好呀～你係咪就係希仔女朋友呀？希仔真係有眼光呀！」
愛盈對於言姐嘅出現一頭霧水...
「佢叫王欣言，我通常都叫佢言姐，佢就係編輯嚟嘅，我本書出到佢都有好大功勞架，跟住佢今年冇記錯嘅話係...五十二呀唔係，廿五歲先啱，唔好睇佢個樣咁，其實佢工作能力好高架，唔係嘅話都冇可能咁快就有得做編輯」，我解釋。
愛盈點一點頭：「原来係咁～你好呀言姐！同埋呢...你講嘅書係啲咩呀？」
「係喎你琴晚都冇睇到...」
跟住我就係書架到拎番果兩本書落嚟，俾咗愛盈
「嘩～呢本書，你！你終於得咗喇！」
愛盈見到我終於有實體書之後，興奮到緊緊咁樣攬住我，
「估唔到你會仲開心過個作者，睇嚟你哋真係真愛呀～好喇，我都夠鐘要番公司先喇，記住1月1號有簽書會呀！」，言姐企起身準備離開。
「好，明白」
跟住佢就自己開門走咗，
「嘩～乜你下個禮拜仲有簽書會添呀～真係叻呀～抵錫～」
之後我就攬住佢坐係梳化，兩個人一齊舒舒服服咁樣睇書，睇下睇下就睇到晏晝四點，我發現屋企都好耐冇執過，所以提議一齊執下間屋之後再嗌外賣，結果一開始執就執到六點幾，連個太陽都唔見埋，但係都總算係執乾淨咗，幫憶奇換埋貓砂之後我就睇下有咩外賣好嗌，正當我哋討論完食咩好，準備打電話果陣，門鐘聲再次響起，我開門之後，眼前嘅竟然係...