《突然有條女同我同居》(冇甜): 18

憶奇篇

又一個...又一個垃圾拋棄我，點解人類呢種生物咁醜陋。

明明一開始帶我走果陣對我好好...但係有咗男朋友之後就無再理過我...仲要拋棄埋我，唔通我天生就得唔到幸福？

出世兩個月媽媽就唔見咗...爸爸就俾人捉走咗...之後我自己比人領養又拋棄...呢種生活...以人類嘅時間嚟計嘅話...應該都有兩年？

唔通我要係呢個箱入面餓死...我成世貓入面都未識過女朋友仔...



講開又講，個八婆真係癲架喎，竟然放我係一個咁大嘅箱入面，我跳咗兩日都跳唔到出去...

「我好肚餓呀....」

我忍唔住講咗出聲，我係咪已經開始餓到用唔到個腦嚟諗嘢喇....咦？果度有個人類喎...

幾個鐘之後...

果個人類竟然聽得明我講嘢...呢啲係，咪就係佢哋叫做超能力嘅嘢，話說呢個人類...好似叫希哥呀嘛...其實都幾好人。



對比起以前果啲，佢係我見過最好嘅人類對任何事物都咁細心...但係...點解我感覺佢好似...有啲奇怪...同其他人類唔同...佢...有一種憂鬱嘅氣息，同埋唔知係我錯覺定係點，佢感覺有種...殺氣？

而且...有小小恐怖嘅氣息...好似一個統治者...仲要散發住冰冷嘅感覺...

而且呢間屋仲有一個人類，應該係佢女朋友，雖然佢呢個人天真又可愛，但係...佢竟然一見到我就帶我去沖涼，不過...其實沖完之後..都幾舒服呀...呢度...竟然可以令我感覺到咁溫暖，咁...我就暫且住係度啦！

一段日子之後....

呢度都幾爽，有兩位奴才日日服侍住我，雖然呢兩位奴才成日放閃...不過奴才希話有禮物要送比我...咁就算啦...但係我都想要個女朋友呀...



再過多陣....

奴...奴才你竟然送啲咁嘅嘢俾我！我嘅英姿呀！呢隻黃色老鼠都唔靚仔！雖然望落去幾好食....

時間嚟到而家呢一刻...

「今...今日天氣唔錯喎...」

死喇！我...我竟然咁緊張？！對...對面只不過係隻貓女咋嘛！

「哈哈哈...你都幾得意喎....」

得意？佢話我得意？唔同佢對我有好感？嘻嘻嘻嘻...有女霖朕喇....嘻嘻...

呢個時候...我後面有隻啡貓行過嚟...仍仍一見到佢之後就話，



「BB！我好掛住你呀！」

之後就行埋去磨佢...哈...哈....其實...單身都唔錯呀...

奴才你哋做乜用個憐憫我嘅眼神望住我呀！

憶奇篇

完