《毒L和初戀相識的日子》: 第一百八十四章 結緍

第一百八十四章 結緍

等咗一陣終於load倒啲相，原來今日係Winnie阿姨個仔結婚嘅日子，佢喺現場影咗幾張相比我睇。

啲相係佢自拍同埋影吓周圍嘅環境，我睇完之後覆咗幾個表情符號比佢。

番到屋企之後，我梳洗吓就去瞓喇，一瞓就到第二朝。

琴晚同阿Paul同埋晴晴食完嘢之後，今日就八號波喇。





「天文台現已發出八號東南烈風或暴風信號。」電視新聞正在報導着。

街上落起傍陀大雨，於是我就開電腦打吓機。點知，Winnie突然Whatsapp我:

「開Skype傾計囉~」(10:20)

我當然即刻走去開啦。不過，依家英國係凌晨三點，乜Winnie仲未瞓咩...

「你仲未瞓嘅？」





「係呀，琴日我阿姨個仔結緍呀，我去咗個婚禮吖嘛~ 你都知㗎~ 啱啱十二點先完，我再send啲相比你睇吖~」

「恭喜佢喎~ 咁妳去個婚禮覺得點~？」

「今日都幾開心，第一次參加英式婚禮~ 首先喺教堂影相同見證，再喺戈度影大合照。之後再轉地方去食聚餐。同香港婚禮唔同，呢邊似party，而香港就係擺酒。」

「咁妳中意中式定英式吖~？」

「唔知呢~ 你覺得呢，男班長？」





「我冇做男班長好耐喇~」

「叫慣咗吖嘛~」

「咦，你阿姨個仔都幾高大喎~」我用部電話睇Winnie send比我啲相之後講。

「之前同佢同埋佢未婚妻玩遊戲輸咗，我比佢地罸要轉WhatsApp icon一日。點知，咁啱就比你見倒... 後尾Zoe同我講先知...」

「都過咗去啦~ 我後尾都知道咗~」

「咁你依家搞緊乜~？」

「香港呢邊今日八號風球，廢事落街啦。我原本諗住打吓機咋，妳就搵我喇~」

「原來係咁，都估倒你㗎喇又打機~」





「咁妳呢，妳個樣都好攰喇喎。」

「咁人地想同你傾計吖嘛~」

「妳瞓覺啦，有精神先再傾啦~」

「等等先，我有樣嘢想同你講呀，男班長。」

「妳想講咩~？」

「I love you~」Winnie仲加上一個心心手勢。

佢係咪受咗個婚禮影響呢，之前都未試過咁....





「我都係~」 我都向Winnie做咗戈個手勢。

「咁我地遲啲再傾啦，拜拜~」

「拜拜~」

我熄咗個Skype，之後打咗陣機，冇耐就落咗個八號風球，天色都漸漸好轉。

呢個時候，我望吓電話，收倒家怡send比我嘅一個信息。





結緍，對現在嘅我嚟講，仲係好遙遠嘅事...