《毒L和初戀相識的日子》: 第一百三十八章 雞煲夜
第一百三十八章 雞煲夜
時間過得好快，Summer sem已經完咗喇。依家係八月中，sem break嘅中後段。今日約咗I大嘅朋友出嚟食飯。我地約咗喺旺角東火車站附近嘅一間酒樓食雞煲，而出席嘅人有阿Paul、晴晴、阿俊、Jenny、家怡同埋Christy。之前聽晴晴講，家怡同阿文已經分咗手喇。
自從Winnie去咗英國之後，每逢有聚會我多數都會出席，不過心入面會有一點兒嘅失落感。
我地約咗七點喺旺角東火車站等，當我到咗戈時就見倒阿Paul同晴晴。
「Joseph哥，你冇嘢吖嘛？有嘢記得同我地講。」阿Paul同我講。
其實呢段時間佢地都會咁樣關心我，驚我有事。不過，依家可以透過視像通話見倒Winnie，我又點會有事吖。
「冇事呀，成日都問㗎。」我回應。
「咁你同Winnie點呀？」晴晴問。
「都係咁啦，隔日就會同佢Skype傾計，同埋都會Whatsapp保持聯絡囉。」我回應。
「咁咪幾好囉~」晴晴回應。
「仲有你都知家怡同阿文分咗手㗎啦？」晴晴補充。
「我知阿，妳之前講過吖嘛。不過，佢地做咩分手嘅？」我問。
「家怡嫌阿文好煩，成日都搵佢，問佢喺邊、做緊乜，什至打好多次電話比佢，令佢覺得好困擾。所以佢就提出分手喇。」晴晴回應。
一對情侶，比對方空間都好重要。
之後，阿俊、Jenny、家怡同Christy陸續都到喇。我地行到去酒樓，好多人等緊位。由於太多人等位，所以我地分開咗企。等候嘅期間我同阿俊、Jenny傾咗陣計。
「你同Winnie最近點呀？」阿俊問。
「都係咁啦，Keep住同佢Skype同Whatsapp。」我回應。
「其實好難得㗎，你地相隔咁遠都可以保持住聯絡。」
「都係㗎，唔係個個人都可以做倒。」
「咁，你有冇掛住人地呀？」
「咁就緊係有啦，始終都想見吓真人。」我失望地回應。
此時，Jenny都行咗埋嚟。
「你地傾緊乜呀？」Jenny問。
「都係戈啲啦。」我回應。
「Winnie喺英國最近點呀？」Jenny問。
「佢嚟緊九月中都會開學㗎喇，依家喺佢阿姨屋企住。」我回應。
「你冇諗過飛去搵人咩？」阿俊問。
「有㗎，不過Winnie叫我留番啲機票錢，一來一回都過萬蚊....」我回應。
「咁又係，如果都係喺亞洲就話易啲飛倒過去吖。英國真係好遠。」Jenny回應。
此時，我去咗個廁所。出番嚟之後仲未有位，我就同Christy、家怡傾咗幾句。
「有冇掛住人呀？」Christy問我。
「咁點都會掛住嘅。」我回應。
「Well, long distance relationship 好浪漫呀。」家怡講。
「但係你有冇信心同人地可以長久㗎？」Christy問。
「我...」
「如果Winnie一世都留喺英國，咁你點吖？」Christy打斷咗我講嘢。
呢個問題，我真係冇諗過。
「Hey，唔好咁啦妳。」家怡對Christy講。
「咁係吖嘛，你遲早都要面對呢個問題㗎。」
「唔通你跟埋去移民咩？」Christy激動地講。
「不如妳比啲空間Joseph佢地啦，妳過嚟...」家怡拉走咗Christy。
Christy今日好似同平時有啲唔同，呢啲會唔會係我嘅錯覺呢。
「六十三號，七位。」
終於有位喇。呢間雞煲好正，無限添雞之後再打邊爐，雞有雞味，個汁都好夾。另外飲品係任飲嘅。
除咗阿Paul、晴晴同Jenny，大家都有飲咗啲酒。當中Christy好似醉醉地。
我地食完之後行番去旺角東火車站。阿Paul同晴晴住大埔，阿俊同Jenny住黃大仙附近。而家怡住上水，Christy住沙田。佢地都係搭鐵，而我就搭巴士。我同佢地喺旺角東火車站解散，正當我想行去搭巴士戈時，家怡突然叫停咗我，而Christy唔太清醒咁企咗喺佢隔離。
「Joseph，你可唔可以送Christy番去呀？」家怡問。
「吓，都唔順路...」我回應。
「幫吓手啦，我屋企人嚟咗車我番去呀，㗎車坐埋我就冇位...」家怡講。
「唉，咁好啦。」我回應。
「咁我行戈邊啦，拜拜。」
「拜拜。」
就係咁，我扶住Christy搭鐵番沙田。喺車上面，我地坐咗個橫排位，當時車上嘅人唔多。
我原本約咗Winnie 凌晨十二點開Skype，睇嚟都要延遲喇。所以我Whatsapp咗佢:
「今日要遲少少先開Skype，Sorry呀...」(23:33)
Winnie傳來了一個信息
「好呀，我等你.」(23:36)
我同Chirsty到咗沙田，不過我依家先發覺其實我唔知佢住沙田邊度。
「喂，Christy，你住邊㗎？」
「第一城呀。」
「咁搭的士囉。」
喺的士上，Christy明顯仲好有醉意。
「你真係咁中意Winnie咩？」佢突然問。
「其實你身邊都有好多人好過佢吖。」
忽然之間，我唔知點回應佢。而佢都開始合埋對眼。睇嚟佢真係醉咗喺度亂講嘢。
好快都到咗第一城喇。
「到喇。」我對Christy講。
落車之後，我扶佢行去佢戈座嘅大堂出面。
「我到喇。多謝你送我番嚟喎。」
「好啦，咁我走喇，拜拜。」
「拜拜。」
我睇住佢入咗大堂就走喇。之後，我飛番的去沙田站，趕尾班巴士番屋企。
即使相隔幾遠，我個心都只會喺妳度。