《毒L和初戀相識的日子》: 第一百二十六章 不知所措

第一百二十六章 不知所措

「係我呀......」Winnie回應。

晴晴喺籃入面拎番部電話比佢。

「我去聽個電話先。」Winnie講完就行咗出去。

依家時間係九點十分左右，我地可以坐多二十分鐘。





大約五分鐘之後佢行番入嚟。喺呢五分鐘入面，大家都各自傾計，而Zoe就同我講番今朝發生嘅事。

「唔好意思呀，我屋企有事要走先喇，下次先同你地去唱K啦。」Winnie對大家講。

「不如陪妳番去吖~？」我問Winnie。

「唔洗啦，你同大家玩得開心啲啦。拜拜~」Winnie回應。

佢好快就拎埋個袋行咗出去。





「咁大家拎番電話先啦。」晴晴對大家講。

「你知唔知Winnie屋企發生咩事？」阿俊細細聲問我。

「知少少啦，不過佢唔肯講。」我回應。

「阻阻你地，麻煩埋咗張單先。」一個店員行過嚟講。

之後，我地落番地下。





「有邊個一齊去唱K㗎~？」晴晴問。

除咗Christy同Zoe，大家都去唱K。

「啱啱講嘅嘢，你自己諗吓啦。」Zoe走之前同我講。

「拜拜~」Zoe同Christy對大家講。

我、阿Paul、晴晴、阿俊、Jenny、家怡同阿文一齊行番落旺角嘅Neway唱K。

一路上，我諗住Zoe啱啱喺放題店入面同我講嘅嘢。

---9:10 pm---
---日式放題店---





「今朝Winnie搵過我。原本我地約咗四月八號會同幾個中學同學一齊出席我地中學班主任個婚禮，今朝約出嚟揀衫同埋食lunch。不過，Winnie今朝打比我話佢到時已經唔喺香港，所以唔洗預佢。」

「我再追問落去，不過佢冇再講咩事，淨係叫我唔好同任何人講。」

「我覺得你係佢男朋友，應該要知呢件事。」Zoe細細聲同我講。

「吓，咁我應該點做？」我問Zoe。

「你自己諗啦。之前你地嚟我屋企打牌，我咪問過你如果Winnie突然有一日唔喺你身邊，你會點嘅？」

「係呀，我記得呀。」

「其實係Winnie叫我問㗎，佢話想睇吓你嘅反應。我唔知佢有咩意思，不過我估Winnie遲啲可能要離開香港一段時間。如果你問佢，佢應該會答你嘅。」Zoe回應。

聽完Zoe講，我有啲不知所措嘅感覺。





---10:22 pm---
---旺角彌敦道---

「諗緊咩呀？」阿俊問我。

「冇呀。」我回應。

「都係見少一陣姐~」阿俊講。

「咩喎... 又關事嘅...」

「你個樣出賣咗你啦~」











唔知點解，我感到有啲不知所措。