《毒L和初戀相識的日子》: 第一百零八章 和好如初

第一百零八章 和好如初

「你都知David同Zoe鬧咗交㗎啦，依家佢地兩個仲未和好。」阿俊同我講。

「咁所以呢？我有咩可以幫手？」

「一陣David會去Zoe屋企同佢認錯，你同Winnie講聲吖，不過叫佢唔好同Zoe講喎。」

「好啦。」





呢個時候，梁sir入咗班房，開始上堂。

「早晨呀各位。大家交Assignment出嚟啦，如果未搞掂嘅五點前放去我個Assignment Box啦。」梁sir對全班講。

而我用Whatsapp同Winnie講完之後，佢好識做咁離開咗Zoe屋企。

「我同Winnie講咗喇。」我同阿俊講。

「其實戈日David本身已經心情唔好，所以先會發咁大脾氣。佢依家已經好後悔㗎喇。」阿俊回應。





我地繼續喺度上堂，到放學戈陣佢地兩個已經冇事喇。

「佢地冇事喇~」阿俊同我講。

「你又知嘅？」

「David Whatsapp同我講咗嘛~」

「咁就好喇~」





放學之後阿Paul同晴晴去沙田廣場戈邊食嘢，所以我同佢地一齊走。

「Joseph哥，有冇發覺Winnie最近好似想去旅行呀？」阿Paul問。

「點解咁問嘅？」我問。

「我地兩個上個星期喺元朗撞倒Winnie同埋佢阿媽，佢地去咗整護照續期。」晴晴回應。

「係咩，我冇聽過Winnie話想去旅行喎...」我回應。

「有冇搞錯呀？關心多啲你自己個女朋友啦！」阿Paul回應。

「咪係囉！」晴晴回應。

「係嘅係嘅。」我回應。





我地經瀝源邨行到去沙田廣場，之後就解散喇，而我就行去搭巴士番去。






兩個人和好如初，總要有一方先主動。