《毒L和初戀相識的日子》: 第九十九章 天地堂

第九十九章 天地堂

三日之後到星期四，今日係天地堂。朝早番九半到十半，下晝番三半到五半。

如果可以，我會選擇走咗朝早戈堂。不過，今朝戈堂有個test，所以冇得唔番。而下畫戈堂會講project，所以都唔走得。

今日我如常同Winnie一齊番學。

「男班長，溫書溫成點呀~？」Winnie喺車上問我。





「還可以啦，咁妳呢~？」

「我琴日都溫咗好耐~」

「加油啦一陣~」

「你都係呀~」

番到I大之後準時開始test。時間去到九點半就開始做份卷。





測完之後，心情都放鬆哂，因為份卷大部份都識。

「你地一陣去邊呀？天地堂喎。」阿俊問。

「我地要去新城市買嘢~ 一唔一齊去呀~？」晴晴回應。

「好呀。」Jenny回應。

「咁你地呢~？」晴晴問我同Winnie。





「一齊去囉~」Winnie望向我一眼之後回應。

我地總共六個人由I大行去新城市，首先係食Lunch先。我地去咗food court食嘢，食完之後大家就陪晴晴去買嘢。

晴晴話想買幾件有牌子嘅衫同埋鞋，一講到呢啲話題，Winnie同Jenny都好有興趣。

佢地三個女仔一路行，一路傾關於打扮嘅嘢。而我、阿俊同阿Paul就傾打機嘅話題。

入到一間算比較出名嘅舖頭，晴晴揀咗幾件衫去試，Winnie同Jenny就比意見佢。而我地三個男人只好周圍行吓，傾吓閒計。

最後，過咗唔知幾耐，晴晴終於決定好，然後去比錢買咗兩件衫。

「Joseph哥，遲吓你就慣㗎喇。啲女仔係咁㗎喇，買嘢會搞到唔知時間~」阿Paul有少少無奈咁同我講。

「係呀，買得耐少少都唔係問題。最弊係佢問你意見，你又唔識答呀，唉。」阿俊心同感受地回應。





好彩Winnie買嘢係唔會買咁耐嘅姐。不過，就算要咁耐，我都會好落意去等嘅。

「好喇，我地走得喇。」晴晴拎住袋衫對我地講。

我地最終冇去到睇鞋，因為已經夠鐘要番I大了。

到五點半就放學喇，我同Winnie一齊番去。




今日四個鐘嘅天地堂空檔，過得好快。