《毒L和初戀相識的日子》: 第九十六章 考慮

第九十六章 考慮

「妳想問啲咩呀~？」我問Winnie。

「今晚你上唔上嚟我度食飯呀，男班長~？」Winnie問。

「吓，你屋企人都喺度㗎喎......」

「得我阿媽喺度咋，其實佢都知我拍緊拖啦~」





「吓，點解嘅~？」我覺得有啲驚訝。

「我成日都同你喺屋企附近出現，有一次比佢見倒，之後佢咪知囉。」

「Oh... 原來係咁...」

「啱啱個電話係我阿媽打嚟，問你上唔上我屋企食飯喎~」

一時之間，我都比唔倒啲咩反應比Winnie。





「其實你遲早都會上嚟㗎啦，早啲見唔好咩~？」Winnie問。

「Winnie姐姐，我想番屋企喇。」Tommy同Winnie講。

「好啦，我地番去喇。」Winnie回應。

「你有一段路程可以考慮答案，番到樓下之前答我啦~」Winnie同我講。

我地離開商場，慢慢行番去。Winnie拖住Tommy行，而我就行喺Winnie隔離。





一路上，我喺度諗: 其實，我同Winnie都一齊咗一段時間，係咪時候要去見一見伯母呢？

唔擅長做決定嘅我，都唔知比咩答案好。

距離屋企樓下嘅路程越嚟越短，我都未諗倒點答好。於是，我決定問吓啲朋友嘅意見。

我Whatsapp咗阿Paul講呢件事，佢嘅回覆係:「Joseph哥，緊係上去啦！伯母都叫得你上去食飯，你唔係唔比面掛？」

另外，我都Whatsapp咗阿俊講，佢就話:「我嘅睇法係，如果你準備好就上去啦，如果未準備好你就唔好勉強自己喇。」

話咁快，已經行到屋企樓下喇。我已經考慮清楚，準備好比答案Winnie。









考慮一樣嘢，都唔係容易嘅事......