《毒L和初戀相識的日子》: 第九十三章 計劃

第九十三章 計劃

到咗星期五，又係上晝上一科主科，下晝上全人嘅happy friday。過咗幾日，Winnie嘅感冒都已經好番喇。

今朝約咗Winnie一齊番學。喺車上，佢問我後日得唔得閒。

「都得閒呀，做咩咁問嘅~？」我反問番Winnie。

「後日我表哥同佢老婆要去澳門做一日嘢，佢地決定放低個仔比我阿媽睇住一日，夜晚嚟接番佢走。之後我阿媽叫我戈日帶佢去玩，咁睇吓你有冇興趣同我一齊湊一日細路吖~」Winnie回應。





「原來係咁~ 好呀，我有興趣呀~」

「咁戈日大約十二點搵你出門口啦，喺樓下等~」

「好呀~」

番到I大之後，上晝嘅主科堂好鬼悶，Winnie喺度開youtube睇片，坐我地前面嘅家怡就僕咗喺張枱度瞓，Christy就好認真聽書。至於坐隔離行嘅阿俊同Jenny就喺度玩手機game，而附近嘅阿Paul同晴晴就一人一部notebook，好認真咁上堂。

落堂之後，家怡再次好快咁離開班房，我離遠見倒阿文喺出面等佢，而大家都知道咩事喇。





我地落咗去canteen食飯。之後上番121號課室，準備上全人堂。

「大家好，又係我Billy sir，今日會教大家做最後一堂戈個活動。首先要抽籤去決定每一組喺咩場合去舉辦呢個活動，然後比時間大家討論，下堂每組要交一份proposal。」Billy sir對全班講。

「最後一堂個活動大家係舉辦者，亦都係參與者。你地班有六組，活動嘅對象就係全班同學。所以如果最後一堂唔番，呢科就好大機會唔合格喇。」

我地組抽倒個場合係「Annual Dinner」，之後我地討論同計劃吓究竟舉辦咩遊戲好。

「有咩睇法阿，男班長~？」Winnie問。





「你地呢~？」我問。

「不如開口中~？」阿Paul提議。

「要團隊合作嘅遊戲喎~」晴晴回應。

「玩番有口難言囉~」家怡提議。

「我覺得不如玩估歌仔吖~ 每組一齊估，之後派一個人出去鬥快拎咪講答案~」Winnie提議。

「都幾好喎，我贊成~」我回應。

阿Paul、晴晴同家怡都同意。

討論過後，Billy sir又再講多少少PowerPoint，就落堂喇。





「今日去到呢度。下堂大家記得交proposal，同埋下堂全班會玩一個大型遊戲，大家記得準時番。祝大家週末愉快，兩星期之後再見。」

我同Winnie一齊番去，佢今日要同屋企人去旺角食飯，所以我地喺火車站分別。

「咁星期日見喇喎，男班長~」Winnie同我講。

「好啦，拜拜~」

「拜拜~」




認真去計劃一件事，係好重要嘅。