《毒L和初戀相識的日子》: 第三章 破冰

第三章  破冰

「大家分完組之後， 麻煩派一位組長出嚟交你哋嗰組嘅名單畀我。」 Billy Sir對全班講。

「有冇人想做組長？」Paul問。
「不如Winnie?」晴晴回應。
「不如猜包剪揼決定啦。」Winnie話。
「Good idea, 就咁啦。」家怡回應。
「包，剪，揼！」
結果係，我一嘢就比人KO.... 四個出剪，一個出包，而戈個... 就係我...




「恭喜你呀Joseph。」Paul話。
「寫名出去啦，男班長。」Winnie恥笑地同我講。
「唉，好啦。」我無奈地回應。

各組都交咗名單後，課堂就正式開始。

「今日第一堂， 可能大家之間都唔係好熟悉，唔緊要嘅，今日呢堂就同大家玩幾個破冰遊戲，等你哋可以互相認識，亦都可以識下新朋友仔。」

「第一個遊戲就叫做九宮格。一陣我會問九條關於大家興趣同習慣嘅問題， 而大家要分別將答案寫喺嗰九格入面任意嘅一格。寫完答案之後，再同其他同學match吓， 睇下有冇相同嘅興趣， 如果有就喺對方張紙度圈一圈， 順便同對方傾下偈啦。」





「第一條，寫最中意嘅一種顏色。」
「第二條，大家最常做嘅運動。」
「第三條，大家最中意嘅一種食物。」
四至八分別係飲品，旅行地方，電話牌子，服裝品牌同埋興趣。
………………
「最後一條，大家最中意嘅歌手。」

「好，如果大家寫完嘅話， 先同組入面嘅人match吓，之後可以出位去其他組同其他同學match。」

Winnie主動同我對咗先。




「咦，乜你都中意周杰倫。」Winnie同我講。
「係阿。你最中意飲朱奶？」
「係呀，我唔飲唔舒服㗎。咦，原來你中意食芝孖，我都中意，不過我中意豬柳蛋多啲，哈哈。」
「哈哈，豬柳蛋我都ok。um... 其實日本旅行都幾好，不過我中意台灣多啲。」
「日本啲人好有禮貌，對人嘅態度好好，唔似得香港咁。」
「啱呀，香港好多人郁D都黑口黑面。」

Paul 同 晴晴對完之後，Paul主動搵我對，而Winnie就同晴睛同埋家怡對。

「Joseph哥，你同Winnie係咪一早識？」Paul問我。
「唔係呀，今日先識。」
「會唔會係咁呀？！ 你地咁夾，仲以為你地都係拍緊拖添。」
毒L連同女仔講嘢都淆，又點敢諗拍拖吖。
「哈哈，Winnie咁可愛，實有男朋友啦。」
「咁你對人有冇意思先？」




「咪玩啦，第一日識，要D時間了解吓。」
「明嘅明嘅Joseph哥。要幫手記得出聲。」
我無奈地點點頭。
「你地傾乜傾得咁開心呀？」晴晴問。
「冇，同Joseph哥傾吓閒計姐。」
Winnie望了我一眼，附上一個可愛嘅笑容。



好似係第一次有女仔咁同我笑~