[愛情走糖故]兩個人心底中不為人知嘅秘密,成為兩個人間嘅牽引: 165.你是我的⋯專屬天使！

凌御生喺信封入面拎咗張聖誕卡出嚟，一打開入面寫滿咗密密麻麻嘅字

「Aaron BB：

聖誕快樂，呢個係我地第一個聖誕節，識到你真係好幸運，亦好幸福～同你一齊嘅每一日都好開心～有時覺得，如果當初唔係你發現我嘅秘密，可能我地都唔會有機會認識對方…我地真係好有緣份呢～多謝你一直都喺我身邊，陪住我照顧我，有你喺我身邊我真係覺得好Lucky，希望你一直都在。Merry Christmas～

初為人地女朋友，請多多指教～

你嘅專屬小女孩Ella」





凌御生一邊睇，嘴角不自覺地上揚

「傻妹…」凌御生喺心中柔聲講道，「遇到你係我Lucky至真…」

凌御生將聖誕卡收番入封信封入面，然後企起身行咗入房，將聖誕卡放喺書枱上

再行番出廳嘅時候，凌御生拎起結他，心中諗住夏巧莘寫嘅嘢，一字一句成為咗佢無型嘅動力

喺凌御生嘅心中，只留下一句話：今晚一定要做得好好睇睇！





…

夜晚19:25

喺學校嘅禮堂已經聚集咗高中嘅同學，因為考慮到初中同學夜歸嘅安全問題，呢個活動淨係開比高中生

凌御生坐喺後台嘅等候室，佢係第三個出場表演，鍾家豪同佢一齊喺後台等候，好讓凌御生冇咁緊張

「陣間出場加油，我喺後台等你。」鍾家豪拍一拍凌御生嘅博頭





夏巧莘同嘉怡喺表演開始前趕到番嚟

「哈…哈…」夏巧莘同嘉怡入到禮堂，喺後方喘着氣，休息一下先行上前

「陣間我地行前啲睇好唔好呀？」嘉怡問道

「好呀！」夏巧莘點一點頭，然後東張西望的，心諗：「唔通佢同鍾家豪未番到嚟？但表演就開始啦喎…」

夏巧莘都趕唔切拎手機搵凌御生，嘉怡就已經拉住夏巧莘行上前，行到差唔多第三排先停落嚟

夏巧莘手上一直拎住手機，等凌御生搵佢，但手機仍然冇響過，夏巧莘不禁諗到可能佢兩個已經番咗嚟

時間去到19:56, 下一個就係凌御生，鍾家豪拍兩拍凌御生嘅背

第二個表演嘅同學已經表演完，外面台上嘅紅色幕關上，工作人員表示凌御生可緣出去準備，佢有5分鐘時間可以準備，但當凌御生Okay之後就可以開始





「到你啦，加油！」鍾家豪同凌御生碰拳

凌御生將手機放入褲袋，企起身行出去同時，夏巧莘嘅手機震動咗一下

Aaron BB：呢個表演完咗之後，天台等

喺夏巧莘回覆「Okay」之後一秒，紅色嘅幕拉開，嘉怡不斷用手拍着夏巧莘嘅手臂

夏巧莘望向嘉怡，嘉怡指一指台，夏巧莘向着台望過去，夏巧莘一臉震驚，心中係滿滿嘅愕然

台上有一張高櫈，坐喺高櫈上嘅人係凌御生，喺佢隔離放着兩支咪，一支咪對住凌御生，另一支對住結他

凌御生見到夏巧莘，同夏巧莘對望着，然後微微一笑，一個深呼吸之後，拎住結他pick撥動着弦線





我不會怪你 對我的偽裝 天使在人間是該藏好翅膀

夏巧莘呆咗咁望住台上被射燈照着嘅男生，是令佢多麼心動呢～

人們愚蠢魯莽 而你纖細善良 怎能讓你 為了我被碰傷

一句又一句嘅歌詞，直打入夏巧莘嘅心房

《專屬天使》呢首歌，係凌御生特地揀嚟唱比夏巧莘聽，因為對凌御生而言，夏巧莘就係佢嘅專屬天使

身邊嘅人紛紛望向夏巧莘，但夏巧莘無暇顧及其他人投來嘅目光，佢嘅目光只停喺坐喺台上嘅男仔身上，心臟嘅強烈跳動告知夏巧莘，佢嘅心的確只會為呢個男仔而動

凌御生抬頭望住夏巧莘，臉上掛上溫柔嘅笑容，唱出佢對夏巧莘嘅心意

沒有誰能把你搶離我身旁 你是我的 專屬天使 唯我能獨占





「宣示主權呀！」嘉怡喺隔離雙手掩着嘴，望住夏巧莘，但夏巧莘嘅雙耳，淨係聽到凌御生嘅歌聲同歌詞

凌御生同夏巧莘四目交投，夏巧莘終於知道凌御生要送比佢嘅禮物係咩，原來係要當眾宣示主權

夏巧莘忍唔住甜笑起嚟，坐喺台上嘅凌御生都可以望到夏巧莘泛紅嘅臉頰

沒有誰能取代 你在我心上 擁有一個專屬天使 我哪裏還需要別的願望


最 後 倒 數 1 集

IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link