[愛情走糖故]兩個人心底中不為人知嘅秘密,成為兩個人間嘅牽引: 149.你們兩個，很熟呢？

「喂你兩個…」夏巧莘喺醫院門口停低咗，叫住佢兩個，「係咪有啲咩共同嘅秘密？」

「冇呀。」凌御生同夏學謙竟然異口同聲咁答道

「冇？」夏巧莘行到去兩人面前，壓低聲線嗌道，「夏學謙！」

「咩呀？」夏學謙假裝淡定咁講道

「你一早知佢屋企開酒吧嘅？」夏巧莘望住夏學謙，然後望向凌御生，「你一早知道我喺你屋企嗰間酒吧度做嘅？」





本來夏巧莘唔會察覺到啲咩問題，但係見兩人迴避閃縮嘅眼神，夏巧莘便頓時察覺到有不妥

啱啱喺病房嘅時候，見夏學謙同自己一對上視線就緩緩撇開臉，凌御生又唔望自己就知，兩個人一定有咩事隱瞞住佢

「你地好嘢呀！關係幾時變得咁好㗎？」夏巧莘鼓起兩泡腮，扁起小嘴

「宜家咪講咗比你知囉～」凌御生苦笑道

夏巧莘一直鬧緊小脾氣，一鬧脾氣，夏學謙就收咗聲，凌御生都冇辦法





「我去買餸煮飯，我搭地鐵番去。」夏學謙好識做咁話去買餸，事實上佢真係要買餸

其實搭巴士都得，但係要等凌御生氹番夏巧莘，咁自己又唔想做電燈膽，唯有唔搭巴士搭地鐵

凌御生同夏巧莘徒步行到去巴士站，行到嘅時候剛好有車，都唔洗等好耐

「喂…」凌御生望向夏巧莘，夏巧莘一直冇望佢，耷低頭睇手機

凌御生有啲無奈，但冇話比佢知又真係佢有啲唔啱，而且喺女朋友面前，千錯萬錯都係男朋友嘅錯，凌御生都要做先低頭嗰個





「我唔係故意瞞住你㗎，只係打算遲啲先話你知咋嘛…」凌御生輕輕捉住夏巧莘嘅手腕搖一搖

「你…由我喺度做嗰下開始就已經知道啦？」夏巧莘緩緩地抬頭問道，仍然微微的鼓着腮

「唔係。」凌御生搖搖頭，「我一直都唔理酒吧嘅事，係我老豆管理。我都係有一次唔小心睇到員工嘅file嗰陣先知。」

「咁咪即係你阿爸一早就知係我囉！」夏巧莘雙手捉住凌御生嘅手臂

「佢又冇話唔中意你～佢都好滿意你呀～」凌御生用另一隻手摸摸夏巧莘嘅頭安慰道

「唔…」夏巧莘扁起嘴，又開始要撒嬌，但好快又撇開臉，「哼！你接近我有咩陰謀呀！」

「冇呀～純粹係見到有靚女咪搭訕囉～」凌御生開玩笑道

「哦！即係有靚女就行上去搭訕啦？」夏巧莘喺心中更不悅，「咁你快啲睇下邊度有靚女啦！」





「喺我隔離咪有囉～」凌御生即刻就拖住夏巧莘隻手，手嘅溫暖由凌御生嘅手心傳到夏巧莘嘅手心

「你都未講，你接近我有咩目的呀…」夏巧莘細聲地抱怨着似的

「冇目的～」凌御生喺夏巧莘嘅臉頰上溫柔地落下一個吻，伸手摸摸佢嘅頭，「我今日仲有嘢要做，唔可以陪你番屋企。」

「嗯…」夏巧莘乖乖地點頭

「我陣間落車啦，番到屋企話我知。」凌御生溫柔地道

「嗯…你都要小心呀…」夏巧莘嘅小脾氣無法蓋過佢對凌御生嘅在乎

「知啦！」凌御生微微笑，點一點頭，「好啦，我落車啦！」





夏巧莘同凌御生揮手講拜拜，凌御生落咗車之後，有望番上去上層，見到夏巧莘嘅時後又再次揮一揮手

當巴士繼續向前開嘅時候，凌御生先行去夾Band嘅地方

一上到Band房就比人倜侃起嚟

「捨得嚟啦咩？」鍾家豪喺凌御生開門入嚟嘅瞬間道

「一嚟就窒我想點啫？」凌御生將書包除落嚟掉到梳化上，「宜家咪嚟咗囉～」

「有女就冇兄弟啦～」鍾家豪拎住電結他

「咩呀～一直都有呀！」凌御生行去鍾家豪隔離攬住佢

「好Gay呀！唔好攬住我啦！」鍾家豪扭動着身體甩開凌御生





「唔會唔要你嘅～」凌御生講道

「咚咚。」手機震咗一下，凌御生拎手機出嚟睇




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link