[愛情走糖故]兩個人心底中不為人知嘅秘密,成為兩個人間嘅牽引: 147.心動

「好耐都冇同佢一齊走。」凌御生搖搖頭，笑咗一笑
四人剛好落到地面
「你轉頭先過嚟囉～」軒軒諗都冇諗，就叫凌御生晏啲先去夾Band
「我都想，但日子無多啦嘛…」凌御生無奈道
「嗱，即係咁嘅…」企喺右邊嘅鍾家豪伸出左手，繞過凌御生嘅背搭住佢嘅左邊博頭
凌御生一臉無奈咁望向鍾家豪，無奈咁嘆咗一口氣
「你氹番佢之後，咁一切先會更加順利㗎嘛係咪？」鍾家豪冇直接講明，但係佢講完之後就笑咗一笑，拍咗凌御生嘅博頭兩下就鬆開手
鍾家豪轉身行，阿文同軒軒都拍一拍凌御生
「加油！」阿文同軒軒細聲咁講，隨即就跟上鍾家豪嘅步伐行
凌御生企喺原地，面對住樓梯企，無奈低頭一笑


凌御生背靠住後面雜物房嘅木門，等緊夏巧莘落嚟
企喺呢個位，夏巧莘一出現，凌御生就會睇到，所以夏巧莘唔會走得甩
夏巧莘此時行到一樓，落到樓梯嘅轉角位時望到凌御生企喺下面地面
但夏巧莘冇諗啲咩，佢以為凌御生只係等緊鍾家豪，所以經過凌御生面前嘅時候微微一笑就轉身朝住學校門口行
「喂！」凌御生伸手將夏巧莘一把捉住
「咩、咩事呀？」夏巧莘即刻回頭，一臉疑惑咁望住凌御生
「你唔係原諒咗我啦咩？」凌御生將夏巧莘拉到自己面前，降低咗聲量問道
「係呀…咁做咩呀？」夏巧莘唔明白到底發生緊咩事，只可以一臉疑惑咁望住凌御生
「你見唔到我等緊你㗎咩？你直接就行咗去…」凌御生抱怨道，微微嘟起嘴撒嬌起嚟
「我以為你等緊鍾家豪嘛…」夏巧莘安慰道


見到凌御生咁樣撒嬌，夏巧莘想嬲都幾難
「佢走咗啦…」凌御生仍然扁起嘴，一副唔開心嘅模樣
夏巧莘見到之後忍唔住低頭一笑，凌御生皺起眉頭不解地望住夏巧莘
「係咪行呀？」夏巧莘稍稍收起笑容，只係微笑着
凌御生頓時收起唔開心嘅表情，樂意地行喺夏巧莘嘅身邊
「但我今日唔係直接番屋企，今日要去醫院一轉，要去探下媽媽。」夏巧莘講道，然後假裝着隨口又道，「你要唔要陪我去？」
凌御生愣住企喺原地，喺腦海中仲諗緊係咪自己聽錯
夏巧莘繼續前行，但突然發現本來企喺自己隔離嘅凌御生唔見咗，夏巧莘停低然後回頭望，見到凌御生一臉愕然，難以置信咁望住自己
「做咩唔行呀？」夏巧莘心中異常緊張，但都要故作輕鬆咁行到凌御生面前
「你講真㗎？」凌御生心中有啲小興奮，「你要帶我見家長呀？」


凌御生當然記得要去夾Band，但宜家當然係夏巧莘重要啲
「你可以揀唔去。」夏巧莘一臉不在意咁講
「去！陪你去！」凌御生即刻就點頭，佢只好whatsapp佢地同佢地講晏啲先去夾Band
兩個人一齊搭巴士，夏學謙搭早咗一班車過去
夏巧莘上到上層然後行到去尾三嗰行，行入去坐低喺窗邊，凌御生跟喺後面，坐喺走廊位
一坐低安頓好，凌御生輕輕拍夏巧莘嘅博頭，夏巧莘便冇多諗就望向凌御生
豈料凌御生直接朝住夏巧莘嘅唇吻下去，夏巧莘嘅心臟頓時緊縮一下，然後心中嘅小鹿好似癲咗一樣，亂跑亂跳亂撞
凌御生冇貪心，只係錫咗一下，然後就心滿意足咁坐番好，甜絲絲地笑起嚟
夏巧莘嘅臉頰滾燙起嚟，然後有啲羞澀咁耷低頭
明明今次唔係兩人第一次親吻，但感覺卻同之前唔一樣
今次嘅吻比起之前，更心動…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link