[愛情走糖故]兩個人心底中不為人知嘅秘密,成為兩個人間嘅牽引: 136.原諒我⋯

凌御生心中仍然不忿，但鍾家豪講嘅全部都係事實，無可否認佢真係傷咗夏巧莘嘅心，將夏巧莘嘅心直接打碎
凌御生將車駛到夏巧莘嘅屋企樓下，但佢並冇落車，只係默默坐喺車中
忽然兩個熟悉不過嘅身影，吸引咗凌御生嘅注意
凌御生嘅目光落喺拎住一個白色膠袋嘅女仔身上，眼裏充滿咗歉疚同不捨
女孩同身邊嘅男生有講有笑，但笑容卻無法掩住女孩嘅憂傷
今日喺天台發生嘅事又再浮出，凌御生冇辦法忘記佢喊得幾傷心，心有幾痛幾難受
凌御生一臉心疼咁望住夏巧莘嘅身影，佢笑得再開心，都只不過係強顏歡笑
凌御生打開車門落咗車，但凌御生落咗車之後企喺車門邊
「我做咩落車？」凌御生都有啲搞唔明，自己做咩落車，但雙腿彷彿提示緊佢要做咩一樣幫佢行落車
仍然著住校服嘅凌御生有啲猶疑咁邁步欲走向夏巧莘姊弟




夏學謙似乎感覺到有人向佢地靠近，於是視線轉過嚟望向凌御生，佢見到凌御生嘅同時停低咗步伐
夏巧莘見夏學謙忽然停低，便跟住停低，夏學謙回頭望一望夏巧莘，然後又再次望向正走近佢地嘅凌御生
夏巧莘順住夏學謙嘅視線望過去，一望之下見到係佢嘅心上人，但又諗起今日凌御生講嘅嘢，然後下意識向夏學謙身後行咗一步
凌御生同夏學謙之間保持住3步嘅距離，夏學謙本來對凌御生嘅討厭已經冇咁強烈，但豈料佢傷害夏巧莘
「你嚟呢度做咩？」夏學謙厲眼瞪凌御生，「你仲未Hurt夠我家姐？」
凌御生冇出聲，眼中只有企喺夏學謙身後嘅夏巧莘
但凌御生唔敢伸手去捉夏巧莘，因為自知今日講咗啲傷害到佢嘅說話，夏巧莘一直躲着凌御生嘅目光，但凌御生嘅目光似乎冇離開嘅意思
「我地傾下得唔得？」凌御生終於開口，佢誠懇咁望住夏巧莘
夏巧莘同夏學謙對望咗一眼，夏巧莘低頭微微點頭一下
「你番上去先…我轉頭上嚟…」夏巧莘柔聲道




「嗯。」夏學謙接過夏巧莘手上嘅白膠袋，然後向屋企大堂走去
待夏學謙離開之後，夏巧莘始終冇望凌御生，凌御生想上前攬抱佢，但卻無法鼓起勇氣踏出呢一步
「我地仲有咩要傾…」夏巧莘故意避開凌御生嘅目光
「今日係我過份咗，對唔住。」凌御生先開口道歉，慢慢伸出手拖夏巧莘嘅手，「原諒我好唔好？」
但夏巧莘似乎心中仍有介懷，始終唔開口講一句原諒佢
「你當我係咩…你需要我就對我好，唔想要我就要我忘記，你當我係咩呀？」夏巧莘咬着唇忍着淚，「我都有脾氣㗎…！」
「對唔住，唔好嬲我啦…」凌御生氹着夏巧莘，「原諒我一次啦好唔好？今次係我錯啦，對唔住。」
夏巧莘靜咗兩秒，然後推開凌御生嘅手，轉身欲離開嗰一刻，凌御生頓時從後攬住夏巧莘
「對唔住對唔住，係我錯啦！唔好嬲我啦好唔好？」當初嗰個無比溫柔嘅凌御生番嚟，對住夏巧莘，凌御生似乎無法真係冷漠起嚟
「係你話要保持距離，但你宜家咁樣係算點，你當我係咩？」夏巧莘嘅眼淚已經忍唔住滴落嚟，滴喺凌御生嘅手臂上





IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link