[愛情走糖故]兩個人心底中不為人知嘅秘密,成為兩個人間嘅牽引: 127.他是在鼓勵

「佢個心，只有你，你知道㗎。」鍾家豪再講道，「我知你猶疑緊，但你宜家唔捉緊佢，你會後悔令佢傷心難受。」
「我…」凌御生欲言又止，嘆氣一聲又緩緩開口講道，「我中意佢，又點會捨得見佢難受？每次見到佢喊，我都會覺得好心痛，救佢嗰陣見到嗰個情境，我…我個心痛到好似比人撕開咗咁…我中意佢，但係正因為我咁中意佢，所以我先要考慮多啲。」
「生，你有冇問過佢點諗？」鍾家豪問道
凌御生苦笑起嚟，搖一搖頭
「咁你應該問佢下點諗，佢嘅想法對你嚟講唔重要咩？」鍾家豪講道
佢冇要阻攔嘅心，佢想凌御生捉緊佢嘅幸福，佢嘅幸福其實就近在咫尺，只差在凌御生願唔願意伸手捉緊
「我覺得，你睇到嘅同我地睇到嘅佢好唔同。」鍾家豪呷咗一啖酒之後微笑道，「你眼前嘅佢，係最真實嘅佢，但對於我地呢啲人「仰慕者」嚟講，最真實嘅佢未必係我地接受得到嘅佢。」
鍾家豪呢句說話，其實就直接指出咗凌御生對夏巧莘嘅感情有幾真實
因為面對住除低面具嘅「校花」，佢冇嫌棄半分，佢接受最真實嘅佢…佢中意嘅唔係只有「完美少女」身份嘅校花夏巧莘，而係卸下面具，以真實示人嘅夏巧莘
「其實我中意佢…」凌御生微微抬起頭，緩緩開口道，「好似就只係一個瞬間嘅事…喺發現自己有心動痕跡嘅時候，我就已經中意咗佢。的確，我同你地睇到嘅佢唔一樣，我睇到嘅係本來嘅佢，冇校花之稱嘅佢…」




凌御生回想起當初對夏巧莘嘅心動，嗰種怦然心動嘅感覺仍然喺度，腦海嘅深處冇遺忘當初對夏巧莘嗰種心臟嘅顫動
「夏巧莘，佢就好似大家想象中嘅初戀一樣…男仔對「初戀對象」嘅形容，佢好似，都中晒…」凌御生嘅笑容中帶着一點甜，「我以前從來都冇諗過要拍拖，要搵一個點樣嘅女朋友。自從遇到夏巧莘相處咗一排之後，我開始覺得同佢一齊應該都唔錯，我想要一個女朋友好似佢一樣…好似佢一樣關心我，一樣咁溫柔。」
凌御生自覺講咗啲對佢嚟講算肉麻嘅情話，有啲唔好意思咁耷低咗頭，然後羞澀地尷尬一笑
「我冇你中意咗佢咁耐，但我可以肯定嘅就係我比你更加中意佢。」凌御生仍然帶着笑容講道，望向鍾家豪，就好似要對佢宣示主權一樣，「無論係邊個都好，只要係同夏巧莘有關，我都唔會讓步，就算你係我好兄弟都好。」
凌御生堅定嘅眼神，鍾家豪已經唔係第一次見
自從劉子勤喺學校挑釁凌御生嗰次開始，鍾家豪就已經知道，對夏巧莘，就算對情同手足嘅自己，凌御生決不讓步
「你中意佢我知道，你唔會讓步我亦知道。」鍾家豪無奈咁笑，「我冇打算要爭，如果係真係要嘅話，早就追咗啦，會好似宜家咁喺度同你講？」
凌御生冇出聲，默默一笑
「你唔好猶疑咁多啦，係中意就去啦！我地唔係淨番好多個月番學。」鍾家豪鼓勵道，「總之我支持你就係啦！」
「Music week咪表白囉…」凌御生面有難色，一個有苦說不出嘅樣子




兩個男仔講完少男心事之後，各自番屋企，喺凌御生走之前，鍾家豪對凌御生講咗一句：「中意就去，唔中意就放，閃閃縮縮從來都唔係你嘅作風。」
凌御生喺回家嘅路上一直耷低頭望住地上嘅影子
記得每一次出嚟飲酒嘅時候，地上永遠都會有兩個影子，因為夏巧莘一定喺佢身邊
今日夏巧莘唔喺度，連空氣都變得冰冷，街上顯得特別冷清，自己隻身一人心中更是不習慣

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link