[愛情走糖故]兩個人心底中不為人知嘅秘密,成為兩個人間嘅牽引: 125.第一次追女生要完美點

「喂，你好啲未呀？」凌御生開口第一句就係關心夏巧莘
「仲係好痛啦…」夏巧莘一嚟就對住凌御生撒嬌，然後細聲講道，「而且我好掛住你啦…」
「你講咩話？我聽唔到～」凌御生其實聽到夏巧莘講咩，但係偏偏就想聽夏巧莘講多次
「冇講咩喎～」夏巧莘當然唔會上當講多次
「你呀咁耐冇番屋企休息，你宜家應該瞓喺床度，好好瞓番覺。」凌御生講道
「嗯！」夏巧莘匿入被窩中
「乖乖地瞓番覺啦，好快就有得見我㗎啦！」凌御生甜笑道
「嗯…」夏巧莘握緊手機，心臟噗噗、噗噗的強烈跳着
聽到凌御生嘅聲音，夏巧莘嘅臉頰都滾燙起嚟，漸漸地泛起紅霞
「快啲休息啦。」凌御生柔聲道




「嗯…拜拜～」夏巧莘笑着掛電話，然後將手機放喺枕頭邊，側着身子攬住抱枕稍作休息
夏學謙喺廚房將碗碟洗好之後，行向夏巧莘嘅睡房
「叩叩…家姐你今晚想食咩呀？我落去買餸番嚟。」夏學謙嘅手喺門上敲咗兩下，聽到入面冇人應就再問多次，「家姐？」
夏學謙等咗一陣都係冇人應，便輕輕按下手柄推開房門
「家姐？」夏學謙一推開房門，見到夏巧莘蓋住被瞓咗
夏學謙見到之後，慢慢閂番門，然後換一換衫就落去買餸
凌御生啱啱沖完涼從廁所行出嚟，先啱啱入房喺書枱前面坐低，電話就響起嚟
「喂，我係軒軒呀，你得唔得閒呀？」對面傳嚟一把男仔聲音問道
「得，做咩？今日夾Band？」凌御生一手拎住電話，一手拎住毛巾抹緊頭髮
「時間緊逼呀，下個星期四就表演啦！」喺遠處傳嚟阿文把聲，「我地叫咗鍾家豪㗎啦！佢宜家過嚟，你快啲過嚟啦！」




「嗯，宜家過嚟。」凌御生講完之後將電話放喺書枱上，然後又換咗衫，孭起結他就出去
凌御生落到停車場，將結他放咗喺後座，然後就開車出發去Band房
「鍾家豪你到邊呀？車埋你？」凌御生喺開車前whatsapp鍾家豪
鍾家豪果然好快就回覆，道：「好呀」
鍾家豪講咗自己嘅位置之後，凌御生就開車過去，車埋鍾家豪一齊去Band房
二人去到Band房之後，四個人即係就夾Band，因為凌御生已經講咗要咩歌
凌御生將手機放埋一邊，拎起結他，坐喺高櫈上面彈起結他
「夾一次。」凌御生講道，然後望向軒軒
軒軒舉起鼓棒打咗五下，然後四人就有默契咁直入音樂
練咗一次之後，出奇都冇咩大問題，每一個切入點都好好




「我地真係好有默契。」鍾家豪笑道
「練多幾次熟啲嘛！」軒軒笑道，然後望向凌御生，「要保證佢表白成功。」
「嗯嗯，我地阿生第一次追女仔，仲要追校花呢個級數喎～當然要保證佢萬無一失啦～」阿文都笑咗一笑揄挪道
凌御生笑一笑冇講嘢，鍾家豪見到凌御生咁樣嘅反應，低頭無奈一笑
「凌御生，行咗第一步就行埋落去啦。」鍾家豪講道，但軒軒同阿文都唔明白佢講緊咩，「你猶疑嘅話，陣間就後悔啦。」
「嗯…」凌御生若有所思一笑，然後耷低頭，手指輕輕撥着結他嘅弦線
呢個時候，凌御生放喺門邊梳化上嘅手機響起嚟，四人同時望咗過去
軒軒坐得最近梳化，佢行過去拎起凌御生嘅手機，望到螢幕嗰陣頓時壞笑起嚟

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link