[愛情走糖故]兩個人心底中不為人知嘅秘密,成為兩個人間嘅牽引: 115.綁匪也有好的嗎？

「你點解中意夏巧莘…？」鍾家豪盤着腿坐喺窗檯上，背靠着後面嘅玻璃
凌御生望住書枱隔離尚未拉埋窗簾嘅落地玻璃，窗，望向街外
「因為我見到最真實嘅佢，唔係作為「校花」嘅夏巧莘，係作為「自己」嘅夏巧莘。」凌御生講嘅每一句都係肯定句，「佢嘅所有嘢我都中意，優點缺點都好。」
凌御生講嘅時候，嘴角都微微上揚了，呢個表情大概係佢一日之中最開懷嘅時候
但坐喺窗檯嘅鍾家豪，臉色就沉咗落嚟，佢心知呢場冇得比嘅比賽早就有定局…
…
翌日朝早，凌御生照樣番學，但係完全冇心情聽書，一個字都入唔到腦
鍾家豪望到凌御生一副失魂落魄嘅樣子都唔知可以講啲咩嚟幫佢
「睇嚟佢最近都冇心情夾Band㗎啦…」鍾家豪喺心中默默講道
另一邊廂，夏巧莘仍著住冬季校服，坐喺鐵皮屋嘅角落緩緩睜開眼


夏巧莘都唔知道琴晚自己係點樣瞓著，可能係因為太攰，所以帶着不安嘅感覺打盹然後瞓着咗
「小姑娘，食唔食呀？」琴日著背心嘅男人，今日著咗件黑外皮外套過嚟，佢拎住麵包行到夏巧莘面前蹲低
夏巧莘其實已經好肚餓，但佢更怕佢地會毒死佢
「冇毒㗎，見你咁靚女都唔忍心要你咁慘。」著背心嘅男人無奈咁講道，然後拎出麵包，搣咗一執出嚟遞到夏巧莘嘅口前
夏巧莘一臉猶疑咁望住塊麵包
「食啦…」著背心嘅男人講道，夏巧莘好快咁張開口咬咗塊麵包，「見你靚女先對你好啲咋！係第二個一早就毒打佢啦！」
背心男人行番去摺枱前坐低，夏巧莘再次沉默低着頭
呢個時候阿年去到社團搵凌天傲
「咁早就過嚟嘅？」凌天傲扮咩都唔知咁問道，然後望向企喺門口嘅阿津，「你番出去先啦。」
「係。」阿津點一點頭，然後開門行出辦公室，輕力閂上門之後落咗樓下，離開咗酒吧，去咗外面搵阿年嘅私家車


啱啱凌天傲叫阿津出去嘅一刻，阿津就已經明白凌天傲嘅意思，離開咗酒吧去搵阿年嘅車，安上追蹤器
「一大朝早就皺晒眉咁搞咩呀？」阿年若無其事咁問道
「新抱仔比人捉咗…」凌天傲眉頭深鎖，一臉擔心
「知唔知係邊個做㗎？」阿年露出一副擔憂嘅表情
「唔知。」凌天傲搖搖頭，「完全冇頭緒…」
阿年只係皺起眉頭，但係咩都冇講，凌天傲望住阿年嘅表情，心中更肯定係佢
喺酒吧外已經搵到屬於阿年嘅私家車嘅阿津，蹲喺車尾嘅位置，將個追蹤器貼咗喺阿年嘅車底
為咗要萬無一失咁救到夏巧莘，阿津喺車頭都貼咗一個，就喺車牌後面嗰個位
完事之後，阿津若無其事咁行番去酒吧，經後面樓梯上番二樓，入咗社團嘅會議室
「我要番去睇呀媽啦，佢最近又腳痛又盛。」阿年提起手望一望錶，「你有咩要幫手就搵我啦。」


「嗯。」凌天傲嗯咗一聲
「希望個小姑娘冇事啦…」阿年講完就轉身邁步行向門口，一背向凌天傲時瞬間勾唇一笑

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link