[愛情走糖故]兩個人心底中不為人知嘅秘密,成為兩個人間嘅牽引: 110.她被捉走了

「對唔住。」夏學謙道歉
聽到夏學謙嘅道歉，夏巧莘嘅眼眶忍唔住濕潤起嚟
「唔洗…」夏巧莘咬嘅唇忍着淚搖搖頭，「唔係你嘅錯。」
「家姐…」夏學謙行向夏巧莘，將夏巧莘一把溫柔的抱着，「我淨係想你好㗎咋…只要你開心咩都夠，我知道我地冇可能，但係我想你知道，我心入面其實只係希望你開心幸福就夠。」
「嗯…」夏巧莘點點頭
呢個男仔，其實比自己成熟好多，已經唔再係跟喺自己身後嘅小男孩，身高都已經去到178cm，但感覺上好似仲大過夏巧莘咁，好似夏學謙係哥哥，夏巧莘係妹妹一樣
「我知道，對咗咁多年，點會唔知？」夏巧莘攬住夏學謙，淚水已經忍唔住，從眼眶湧出嚟，「只係一切嚟得太突然，我唔識面對你，要你擔心我對唔住…」
「唔緊要，我知你同佢一齊。」夏學謙笑咗一笑，鬆開咗夏巧莘，「你攰唔攰呀？洗唔洗瞓下？」
夏學謙仍然好似以前一樣關心着夏巧莘，或者佢對夏巧莘嘅愛來自兩邊，一樣係「自身嘅愛」，一樣係由佢嚟到呢個家嘅時候已經融喺佢心底嘅「家人嘅愛」
「唔洗啦～」夏巧莘搖搖頭，然後行番入房




夏學謙望住夏巧莘嘅背影微微一笑，心中默默講道：「希望你以後一直都咁幸福…」
夏學謙知道自己嘅身份除咗係夏巧莘嘅家人之外咩都唔係，所以只可以默默地祝佢幸福，希望佢過得開心快樂，因為夏巧莘開心，夏學謙就開心
縱使只係姊弟，夏學謙都已經覺得滿足，嚟到呢個屋企係最佢最大嘅福氣
「家姐你今晚想食咩呀？」夏學謙喺夏巧莘嘅房門上敲咗兩下
「冇所謂啦～」夏巧莘嗌道
今晚兩姊弟又番番去以前嗰種和諧
…
不經不覺已經踏入11月尾，天氣比之前更為涼快已經，學校都已經轉咗冬季校服
女仔著住白色裇衫，頸上繫着校呔，下半身為深藍色嘅校裙；男仔嘅校服都冇咩太大分別，除咗校褲變咗深藍色之外
今日放學嘅時候，凌御生同鍾家豪一齊，所以夏巧莘就同夏學謙一齊走




夏巧莘同夏學謙踏出校門嘅時候，凌御生同鍾家豪先喺1樓落緊去
「今晚番去食咩好呀？」夏巧莘問道
「你想食咩呀？」夏學謙無奈一笑，「你食嚟食去咪又係嗰啲…」
「咁即係食咩好呀？」夏巧莘無奈一笑
「食煎魚囉…再食菠菜，雪櫃有。」夏學謙諗咗一陣答道
「好呀！」夏巧莘點點頭，夏學謙無奈一笑輕輕搖頭
因為啱啱先放學，外面街上冇咩人，姊弟兩一行到出去巴士站嘅時候，突然有一群人喺前面嗰架黑色私家車跑出嚟，一手就捉住咗夏巧莘
「咩事呀？」夏巧莘完全唔知發生咩事
夏學謙見狀，頓時想跑上前救夏巧莘，但係嗰幾個男人分工合作，三個男人捉住夏巧莘，兩個男人圍喺夏學謙身邊就一輪狂打
夏學謙雖然唔係打交出色，但係都擋到兩下




「喂！你地做咩呀！」夏巧莘拚命反抗，唔係踢着腿就係甩着手郁嚟郁去，「放開我呀！」
「家姐！」夏學謙想推開嗰兩個男人跑上前，但係其中一個男人一腳踢向夏學謙，另一人一拳一拳打落夏學謙嘅小腹上
「走！」其中一個應該係首領嘅人嗌到，然後其中一個捉住夏巧莘嘅男人見四周冇人，瞬間拎出一塊一早落咗哥羅芳嘅毛巾然後掩住夏巧莘嘅口鼻
夏巧莘再反抗多兩下就昏過去了，三個男人合力將夏巧莘一下子推咗入車中，其餘幾個人即時上車開車走
夏學謙都起唔切身去追，呢個時候凌御生同鍾家豪行到出嚟，見到夏學謙一臉驚恐，不知所措
「你喺度嘅？你家姐呢？」凌御生一臉疑惑咁望住夏學謙，因為夏巧莘冇理由突然行到出嚟先同夏學謙分開走
「弊啦！啱啱…有幾個人嚟捉走咗家姐！」夏學謙一臉慌張咁回答，鍾家豪聽到之後臉色一變，凌御生嘅臉色瞬間就係沉了下去，怒火湧上心頭，心中仲有總唔好嘅預感

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link