[愛情走糖故]兩個人心底中不為人知嘅秘密,成為兩個人間嘅牽引: 100.對他而言，沒有「近水樓台先得月」

人人都話，近水樓台先得月，但對夏學謙嚟講就唔係…
夏學謙當然知道喺夏巧莘眼中，佢永遠只係夏巧莘嘅細佬，係家人；同時亦知道，夏巧莘已經心有所屬
嗯…同你所諗嘅一樣，夏學謙…一直都中意夏巧莘，因為佢地並唔係親姊弟…
夏學謙一直都係夏巧莘嘅盾牌，幫佢趕走晒所有身邊嘅男仔，所以喺夏巧莘嘅身邊從來都冇異性朋友嘅存在，直至凌御生嘅出現…
本來夏學謙以為凌御生嘅出現唔會影響到啲咩，但佢錯啦…佢親睇見到凌御生同夏巧莘接吻；見到夏巧莘攬住凌御生；見到夏巧莘對住凌御生嘅笑容一次比一次甜；見到兩個人嘅關係愈嚟愈親暱…但呢一切，佢冇得阻止…
因為佢從夏巧莘嘅眼中，見到凌御生…佢知道夏巧莘中意咗凌御生
夏學謙之所以會討厭凌御生，唔止係因為佢係第一個直接無視自己走到夏巧莘身邊嘅男仔，仲係因為夏巧莘中意凌御生
佢唔係以「細佬」呢個身份呷醋，係以「異性」嘅身份呷醋…
每一次見到佢兩個一齊，就只會覺得夏巧莘真係要比人搶走，自己一直守護住嘅「家姐」要比其他人搶走
夏學謙決定要坦白，就算夏巧莘最後嘅選擇唔係自己都好…




夏巧莘剛好沖完涼出嚟，夏學謙企起身，大步走向佢
「做咩呀？」夏巧莘望住停喺自己面前嘅夏學謙
「我有嘢要問你。」夏學謙伸手捉住夏巧莘嘅手腕
「突然做咩呀？」夏巧莘一頭霧水咁望住夏學謙
「你到底中意凌御生啲咩？」夏學謙先用呢個問題引入自己接下來要講嘅嘢
「吓…？突然做咩咁問？」夏巧莘無奈一笑
「你答我先，我知道你中意佢。」夏學謙一臉認真咁望住夏巧莘，「我地唔係姊弟咩？」
夏巧莘沉默咗落嚟，夏學謙亦冇再追問，因為佢知夏巧莘會回答
良久，夏巧莘微微一笑開口回答
「佢嘅一切我都中意。」夏巧莘簡單又直接嘅答覆直打入夏學謙嘅心房，「就算佢嘅背景係點，我都唔介意亦唔怕。佢比到我其他人比唔到我嘅感覺，就算只係同佢一齊行，一齊做功課，一齊笑下講下嘢我都覺得好幸福…我好中意同佢一齊嘅感覺。佢做嘅每一件事都令我好心動，我好中意佢。」




夏學謙輕輕一笑，夏巧莘定睛望住夏學謙
「係咪你想要嘅答案？」夏巧莘問道
「凌御生，一個一出現就搶走你嘅所有嘅人。我最討厭佢。」夏學謙沉着氣講道，感覺下一秒就要爆炸一樣
「我唔明點解你就唔可以用平常心待佢。」夏巧莘冷靜咁問道
「因為佢搶走咗我家姐，搶走咗我中意嘅人！」夏學謙已經盡量抑壓着，但手卻喺不知不覺間更用力咁捉住夏巧莘
「你…喺邊講咩呀…？」夏巧莘不解咁輕皺眉頭
「我話我中意你！」夏學謙一講完，夏巧莘一臉愕然比唔到反應
「你講咩呀…？我地係親姊弟…」夏巧莘聽到夏學謙嘅話嚇咗一嚇，腦海中一片空白
「哈…親姊弟？」夏學謙冷笑一聲，然後坦白講道，「我同你根本就唔係親姊弟。」
夏巧莘完全無法相信呢個係事實，無法相信眼前呢個同自己一齊長大嘅男仔唔係自己親細佬




「呢啲嘢唔可以拎嚟講笑㗎！」夏巧莘皺起眉頭，嚴肅咁講道
「我冇講笑，我係呢個屋企嘅養子，係爸媽嘅養子。」夏學謙完全冇隱瞞嘅打算，「我嘅親生媽媽叫楊美娜，唔信嘅你去問下媽媽。」
夏巧莘轉動着手腕，想掙脫夏學謙嘅手
「冇可能，我同你一齊長大，你點會唔係我親細佬？」夏巧莘搖搖頭，向後行咗一步
「係我細個親耳聽到，我最近亦同咗媽媽講，媽媽承認咗我唔係親生仔。」夏學謙臉上沒有一絲笑容，「由細到大，我都中意你，因為係姊弟，所以我先可以一直喺你身邊默默中意你…」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link