[愛情走糖故]兩個人心底中不為人知嘅秘密,成為兩個人間嘅牽引: 95.見家長？

經理拎住一個灰色嘅圓盤，圓盤上放咗佢地啱啱點嘅嘢
「食嘢先啦～」凌御生對夏巧莘講道，「你想食咩呀？」
「想食個包…」夏巧莘細聲嘟囔道
夏巧莘咁樣一講，凌御生就企起身幫夏巧莘夾咗個奶黃包入佢個碗
夏巧莘喺碗中拎起個包，直接咬落個包度，然後小心翼翼咁捏着一小件一小件食
「好好食呀！」夏巧莘雙眼發着光講道
「呀。」凌御生望住夏巧莘，然後張開口
夏巧莘自然咁就捏咗小細塊然後放入凌御生個口入面
全程飲茶嘅過程，凌御生都照顧住夏巧莘
夏巧莘想食咩，凌御生就夾比佢食；夏巧莘嘅茶杯入面冇水，凌御生就拎起水壺幫佢酙水，夏巧莘幾乎都冇乜點郁過




飲完茶之後，佢地行出茶樓
「我地載埋你番去啦！」凌天傲拎住車匙
「唔洗啦，我自己搭車番去得啦。」夏巧莘微笑道
「我陪你番去。」凌御生頓時講道，然後望向凌天傲，「我送佢番去先。」
「下次見啦新抱仔。」凌天傲講道
「咁我走先啦～」夏巧莘微微點點彎腰
凌御生拉住夏巧莘轉身走，手輕輕拖住夏巧莘嘅手
「佢嘅手好暖…」夏巧莘感覺到嚟自凌御生手心嘅溫度
當行遠咗之後，凌御生回頭一望，見到凌天傲同阿年已經揸車走咗，便有點不捨咁鬆開咗夏巧莘嘅手
「其實我自己番去都得，你唔洗特登陪我。」夏巧莘露出一副懂事嘅模樣，微笑道




「我知你覺得唔自在…」凌御生伸手摸一摸夏巧莘嘅頭安慰道，「喺我面前唔洗扮啦…」
「嘻…」夏巧莘嘅懂事嘅微笑變成了苦笑，「比你睇到啦…」
「我老豆睇嚟幾中意你。」凌御生轉移話題，露出笑容，諗起啱啱老豆講嘅嘢都覺得難以置信，「我估唔到老豆會直接叫你新抱仔。」
「可惜，我唔係你女朋友…」夏巧莘講出事實嘅同時，亦講中咗自己心中嘅無奈
「你有機會做佢新抱㗎，30歲都冇人要嘅話～」凌御生仲記得嗰個承諾，呢個承諾佢一直都記住，放喺心上重要嘅位置
夏巧莘笑而不語，低頭望住地下，兩手輕輕用手指扣着，凌御生伸手摸一摸夏巧莘嘅頭，手心仍然有餘溫
「你陣間得唔得閒呀？」夏巧莘忽然抬頭望住凌御生
「得，做咩呀？」凌御生問道
「要唔要一齊做功課呀？」夏巧莘小心翼翼地提議道，「你有冇功課做？」
「有呀…」凌御生講道，佢仲欠咗好多功課未做其實




「要唔要去我屋企做功課？我成日都去你度，但你好似都未上過嚟。」夏巧莘露出甜美嘅笑容，「你唔洗擔心夏學謙㗎～」
「咁好啦～」凌御生心中不禁有啲期待
凌御生跟住夏巧莘踏入屋苑大堂，行到去升降機大堂前，等升降機落到地下
升降機門打開，凌御生跟住夏巧莘入去，上到16樓，門打開
雖然前一段日子，凌御生成日都會送醉到不行嘅夏巧莘番屋企，但今次係真係踏入佢嘅家中，唔多唔少都有啲期待
夏巧莘企喺門前拎出鎖匙開門，推門入去之後屋企一個人都冇
「睇嚟夏學謙未番嚟，佢應該喺醫院陪阿媽。」夏巧莘自言自語道
夏巧莘嘅屋企雖然冇自己屋企大，但係好整齊好企理，而且好乾淨嘅感覺，凌御生喺門口除咗鞋，夏巧莘喺鞋櫃入面拎咗對新嘅拖鞋比凌御生
「行啦～」夏巧莘望一望凌御生，然後就行向自己嘅睡房，「幫我手拎嘢出嚟呀～」
夏巧莘嘅睡房嘅真面目，就喺呢道米白色嘅木門後面

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link