[愛情走糖故]兩個人心底中不為人知嘅秘密,成為兩個人間嘅牽引: 63.像糖果一樣的曖昧

兩個人嚟到茶餐廳，凌御生直接經過收銀嘅櫃檯行咗入去，喺旁邊嘅一個卡位坐低
「睇下食咩。」凌御生喺旁邊拎咗個餐牌出嚟擺喺夏巧莘面前
「宜家幾點…」夏巧莘自言自語道，拎出手機望一望時間，「有常餐食～」
「想食咩呀？我諗好啦～」凌御生笑咗一笑，然後喺褲袋中拎出手機
「咁快？我未諗完喎…」夏巧莘鼓起兩泡腮
凌御生嘅目光聚焦咗喺茶餐廳嘅門口，有個好面善嘅男仔行咗入嚟，佢都見到凌御生，仲有…坐喺凌御生對面嘅嗰個女仔
凌御生假裝冇睇到任何嘢耷低頭繼續睇手機，但對方似乎好好奇坐喺凌御生對面嘅女仔係邊個，一直想望下，掀開呢個少女嘅神秘面紗
「諗好啦～」夏巧莘講道，「可以叫嘢食啦！」
嗰個男仔一聽到夏巧莘嘅聲線，就露出一副好似發現咗驚天大秘密嘅表情
凌御生假裝見唔到嗰個男仔嘅表情，然後對住一個著住圍裙嘅阿姨招手，阿姨行咗過嚟，喺圍裙嘅袋中拎咗一枝原子筆同一疊用魚尾夾夾住嘅紙出嚟




「你食咩呀？」凌御生問夏巧莘
「要個常餐，餐肉公仔麵，飲凍可力。」夏巧莘望向落單阿彎姨講道
「你呢？」阿姨望住疊紙一邊寫一邊問道
「常餐，腸仔公仔麵，凍奶茶。」凌御生淨係講咗最重點，然後將餐牌放番去旁邊
夏巧莘冇咩特別意思咁望一望四周，卻發現咗一個熟悉嘅身影
「嗰個男仔係唔係同我地同級嗰個？」夏巧莘頓時擰番轉面，細細聲問凌御生
「嗯。」凌御生淡定咁嗯咗一聲，「啱啱望住佢行入嚟，仲對望咗一眼。」
「吓？」夏巧莘打咗個突，差啲大聲咁吓咗出嚟
「不過似乎，佢對坐我對面嘅女仔感興趣啲～」凌御生微微一笑，「啱啱你同我講諗好嘅時候佢有啲愕然。」
「是旦啦…」夏巧莘嘅回答居然係咁樣，「最多都係番到學校比人講多兩句啫。」




「嗯哼…」凌御生無奈咁點點頭，但心中都係開心嘅
「反正…」夏巧莘嘆咗一口氣，然後用一個無可奈何嘅眼神望住凌御生，「我地行得埋又好，行開啲都好，始終都會比人講閒話。」
夏巧莘拎咗兩隻叉放入旁邊嘅熱水中浸住，然後托住頭望住凌御生
「行得埋又會比人話「佢兩個一定有嘢啦～」，分開啲唔行咁埋又會比人話「明顯係特登唔行咁埋啦！」，既然係咁嘅話，行得埋唔埋都一樣啫～」夏巧莘講得貌似好有道理，但其實都係有啲小機心
「咁你可以避開我㗎。」凌御生輕輕一笑，托着下巴，微微眯起眼
夏巧莘心裏一顫，唔通佢嘅心思已經比凌御生睇穿咗？為咗避免會答錯嘢，夏巧莘決定以微笑嚟回答，只係呢個微笑蘊藏住唔同嘅意思
阿姨拎住兩份常餐過嚟放低喺枱面，當凌御生將夏巧莘嗰份拎起擺喺佢面前嘅時候，夏巧莘好迅速咁拎咗隻叉喺凌御生嗰碗度拮走咗一條腸仔，然後喺自己嗰碗度拮番一塊餐肉比凌御生
「我地交換一個呀～」夏巧莘進行完「交換儀式」之後先講
「你都交換咗啦～」凌御生比夏巧莘逗笑了，然後將夏巧莘嗰碗放番去夏巧莘面前
「唔該～」夏巧莘笑一笑，喺旁邊嗰杯水度拎咗隻叉遞比凌御生




「唔該。」凌御生望住夏巧莘微微一笑
唔知點解，明明只係一件平平無奇嘅事，但係只要係同夏巧莘一齊，再平平無奇嘅事都會變成甜絲絲的
曖昧就好似食糖一樣
糖果嘅甜味會喺口中慢慢滲出，去到喉嚨嘅時候會成為最甜最膩嘅時候，但當再落去嘅時候，糖果嘅甜味會慢慢消失，只會喺味蕾之中留下記號…令人每次都想食多一粒…食多一粒以留住糖果嘅甜味…
凌御生偷偷留意着呢個美人兒，點解呢個女仔就可以咁靚？佢身上散發住嘅氣質狠狠地將凌御生嘅目光鎖喺自己身上
由細到大，身邊都有唔同嘅女仔出現，畢竟讀男女校，但係唯獨夏巧莘…喺佢嘅眼中係如此吸引，如此獨特，令人如此著迷，深深咁迷住咗凌御生

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link