[愛情走糖故]兩個人心底中不為人知嘅秘密,成為兩個人間嘅牽引: 48.一日情侶

凌御生感覺到夏巧莘嘅手由自己嘅手臂移到去掌心，然後有少許愕然咁望一望夏巧莘
但夏巧莘正在處於離心力同令人驚嚇嘅速度之中，凌御生默默咁用力握緊夏巧莘嘅手，好讓佢覺得安心啲
當礦車番到起點，安全扣打開咗嘅時候，兩個人拎起隨身物品企起身嗰刻，先發現自己嘅手同對方嘅手仍然緊緊握住
兩個人對望咗一眼，為咗唔好阻礙到下一批乘客，凌御生拉住夏巧莘離開咗車卡
夏巧莘任由凌御生拉住自己走，佢呢一刻唔想鬆開手，因為鬆咗手之後，或者唔會再有咁樣嘅機會光明正大咁拖住呢個男仔
凌御生拉住夏巧莘行，佢並冇鬆開手嘅想法，因為鬆開咗手之後，就冇機會再可以拖得到呢個女仔
但兩人同時稍稍鬆開咗，但並冇完全鬆開，兩手仍然拖住對方嘅手
「隻手好細，皮膚好滑…」凌御生心諗，「女仔嘅手都係咁㗎？」
兩個人離開咗極速礦車嘅地帶，起程行去反斗奇兵大本營，兩個人一直有啲怕羞同時有啲尷尬咁拖住手行，彼此都唔望對方
當經過迷離大宅前面嘅時候，夏巧莘突然停咗步伐，凌御生亦感覺到突然從後方有人出咗少少力拉住佢


凌御生回頭望，望到夏巧莘嘅臉頰泛起淡淡紅霞，輕輕咬一咬唇
「你要繼續拖住我呀？」夏巧莘微微耷低頭望凌御生
「咁你唔放手？」凌御生直接反問道
「你都冇放！」夏巧莘抬頭望住凌御生
兩個人靜咗落嚟，凌御生諗唔到可以答咩，有機會可以講出口嘅嘢凌御生都冇講嘅打算
「見今日出嚟挽，先比你拖㗎咋！」凌御生為咗令氣氛冇咁尷尬先開口講道
「咩呀！」夏巧莘果真瞬間就降低咗尷尬感，笑道，「係我批准你今日拖我呀！你唔好因為拖過我所以番到屋企唔洗手呀！」
「你先係唔好唔洗手呀！」凌御生都笑起嚟
兩個人之間嘅尷尬感因為凌御生一句話而化解咗，但對於雙方嚟講都係一件好事，至少喺佢兩個人之間嘅秘密事件又再添多咗一項
行咗一陣，經過咗寫住Toy Story嘅積木，夏巧莘同凌御生去到一個極高嘅綠色機動遊戲前


「呢個呢個！」夏巧莘指住呢個機動遊戲，呢個係玩具兵團跳降傘
夏巧莘今次拖住凌御生跑去排隊處，等咗一陣之後就可以挽得
兩個人揀咗一個可以望到外面大半個樂園嘅位置坐低，降傘慢慢向上升，樂園嘅部分露得愈嚟愈多，當上到最高點嘅時候，幾乎可以望到整個樂園
「好靚呀！」夏巧莘露出欣喜嘅笑容
「原來呢到可以睇晒成個樂園…」凌御生講道，將整個樂園都收於眼底
夏巧莘看似望住外面，心中卻覺得甜到膩
降傘停咗幾秒，然後直衝向下
「呀！！！」夏巧莘頓時回神，然後緊緊握住凌御生嘅手，「心都要飛出嚟啦！」
「哈哈…突然講咩呀？」凌御生聽到之後第一個反應係笑咗出嚟，「㩒住佢囉！」
降傘一時向上升，一時又極速下降，什至去到中間嗰陣就極速下降


「要飛走啦要走飛啦！」夏巧莘用右手㩒住喺左邊胸口前
「哈哈哈哈！」凌御生笑到停唔到
呢個機動遊戲就喺笑聲下完結，兩個人落到地面嘅時候，凌御生輕輕扶住夏巧莘
「點呀你，洗唔洗坐一坐呀？」凌御生笑着問道
「唔洗…」夏巧莘搖搖頭，然後拍一拍心口
「咁行啦！去挽下一個啦！」凌御生先邁步走
夏巧莘嘟咗嘴一下，凌御生呢頭話完比自己拖，嗰頭就唔拖自己啦，但夏巧莘都係收起嘟起嚟嘅小嘴，然後跑上前
凌御生留意到夏巧莘由啱啱開始就一聲不吭，暗自在心中一笑，然後偷偷伸手握着夏巧莘嘅手
夏巧莘低頭甜甜一笑，然後打開手拖住凌御生嘅手
兩個人由反斗奇兵嘅跳降傘挽到沖天遙控車，再去到彈弓狗
再往外走，走到幻想世界，坐過小飛象同旋轉木馬，再走到咖啡杯挽咗三次，挽到兩個人都快要天旋地轉似的
「你肚唔肚餓呀？洗唔洗食啲嘢先再去挽？」凌御生溫柔咁問道，然後拎手機出嚟望一望時間，「宜家12點15。」
「唔餓，你餓唔餓呀？我今朝出嚟之前喺屋企食咗個包。」夏巧莘搖搖頭
「我都食咗嘢先出嚟。」凌御生都搖搖頭，「咁我地再去挽啦！」



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link