[愛情走糖故]兩個人心底中不為人知嘅秘密,成為兩個人間嘅牽引: 42.被表白的男生

「阿生佢大概會當嗰個女仔係寶一樣…」凌天傲講道，然後默默抽一口煙，「佢中意，佢開心咪得囉。」
「個女仔生得靚唔靚㗎？」男人好奇問道
「都生得幾標緻。」凌天傲諗咗一陣答道，「同阿生都幾襯，我覺得。」
「阿生宜家點呀？大個仔啦。」男人問道
「愈大愈cool，笑都唔笑平時。」凌天傲聳聳肩，然後將枝煙窒到煙灰缸中，「最近見佢笑，大概係佢望住嗰個女仔嗰陣好溫柔咁笑…阿年，你喺入面太耐啦！世界都變咗啦…」
「我喺入面3年咋，一出番嚟，世上已千年。」叫阿年嘅男人笑一笑，然後企起身準備走，「搵次見下阿生，好耐都冇見過佢。」
「你宜家住邊？」凌天傲問道
「番呀媽度住囉。」阿年笑咗一笑，「唔係去邊？」
「嗯，好。」凌天傲點頭
「呢3年，多謝你代我照顧我媽。」阿年突然感性咁講道




「多咩謝，一世人兩兄弟。」凌天傲拍一拍阿年博頭
阿年踏出社團嘅會室，凌天傲行到旁邊嘅梳化坐低，手搭喺椅背上面
當年阿年一被判咗入去坐監，對自己嚟講已經係一個打擊，親眼望住好兄弟幫社團頂咗條罪，將所有嘢攬晒上身…阿年入咗去坐之後一個月，晴晴嘅死對凌天傲嚟講係第二個重擊
宜家阿年放監出番嚟，再見番面，但係晴晴已經冇可能再同凌天傲見面…
對凌天傲而言，呢個內疚感會跟佢一生…
…
小息嗰陣，夏巧莘一個人坐喺位睇手機，睇到班上一個女同學po ig story，話琴日去咗迪士尼挽
「我都想去迪士尼呀…」夏巧莘托着腮，「但夏學謙一定嫌低B...」
對上一次去迪士尼，好似已經係小學生嗰陣
喺模糊嘅記憶中，迪士尼有旋轉木馬，有咖啡杯，一入去仲有睡公主嘅城堡




「我都想去呀…」夏巧莘伏喺枱上，「但冇理由自己一個去㗎嘛…」
喺心中突然諗到一個人選，夏巧莘瞬間打開whatsapp頁面，正當準備send訊息問佢一唔一齊去嗰陣，外面突然傳來一陣騷動
夏巧莘往走廊望去，見到有好多人圍觀，喺好奇心嘅驅使下，夏巧莘行到課室門口
一行到課室門口，就知道點解外面會傳嚟騷動，原來又係表白環節，一個衣領上繫着蝴蝶結嘅初中女生企喺走廊，手上拎住一封信，微微耷低頭一副羞澀嘅樣子，正講緊表白台詞
個女仔將去信遞起，夏巧莘望向嗰個男主角，心諗係邊個咁好彩
點知一望過去，企喺呢個女仔對面嘅人竟然係凌御生，心中頓時覺得唔好受
明明凌御生話身邊只有自己一個女仔，點解又會有人同佢表白？
心中不安感來襲，凌御生到底會接受定拒絕？如果凌御生接受嘅話，咁自己對佢嚟講又係咩？
心中喺一瞬間湧出大量問題，腦袋都快要受不了
凌御生並未留意到夏巧莘睇住呢齣戲上演，只係喺腦海中諗緊要點樣回答




要答自己已經有中意嘅人定係直接拒絕就得？
「師兄，你可唔可以同我一齊呀？」嗰個女仔紅着臉問道
「唔該借借…」夏巧莘細聲咁講道，然後離開人群，心中嗰種無法言喻嘅難受湧上心頭
凌御生留意到有一個人喺人群中穿梭然後急步行走
「唔可以，唔好意思。」凌御生諗都冇諗就回答，當佢答完之後再抬頭，夏巧莘已經消失喺走廊中
「仆街，比佢見到呢幕！」凌御生喺心中講道，「拜託你唔好誤會啲咩呀！」
凌御生穿過人群，然後急步行去樓梯，然後邁開長腿跑上樓梯
夏巧莘跑到上天台，推開門嘅第一件事係用力深呼吸，平靜不安嘅內心
啱啱嗰一幕直打入佢嘅心房，由夏巧莘急步離開人群嗰陣，夏巧莘察覺自己心中嘅難受好明顯，突然發現自己比想象中更在意呢個人…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link