[愛情走糖故]兩個人心底中不為人知嘅秘密,成為兩個人間嘅牽引: 14.他的故事

夏巧莘聽到凌御生咁問，心中竟然有啲唔開心，點解佢會覺得自己會因為閒言閒語而唔想同佢接近？
「我唔係咁嘅意思…只係我想喺賺錢上靠自己努力換番嚟…」夏巧莘輕皺起眉頭，「我同你仍然係朋友呀！」
「你係校花喎，同我呢種人係一個極端嚟。」凌御生似乎唔太相信夏巧莘講嘅嘢
「我冇介意過人地嘅閒言閒語…」夏巧莘輕輕咬唇，望住凌御生，「冇人係完美，我都唔係。」
凌御生嘅視線稍稍移到夏巧莘身上，見到夏巧莘一臉認真咁望住佢，忍唔住被逗笑了
「你笑咩呀…我講真㗎！」夏巧莘微微鼓起兩泡腮
「我信我信～」凌御生點點頂，呷咗一啖啤酒，然後又再抬頭望天，有啲感慨咁講，「你係第二個咁接近我嘅人…」
「第一個係…鍾家豪？」夏巧莘知道咁樣有啲明知故問，但都係照問咗出口
「嗯…」凌御生點點頭，然後將啤酒罐喺櫈上凌空一放，發出咗「哐噹」一聲，「人人眼中嘅壞學生，邊個行近就會教壞邊個…邊有人會想同壞學生做朋友？」
「我同你唔係朋友咩？」夏巧莘嘟一嘟嘴，「我唔介意同你做朋友呀～」


「我知…」凌御生望向夏巧莘，「但壞學生喺學校係不被接受㗎嘛～」
「咁你做個乖學生咪得囉～點解要做壞學生啫？」夏巧莘側側頭，翹住腳，然後將已經飲到一滴不漏嘅空啤酒罐放喺隔離，然後開一罐新嘅遞比凌御生，自己又再開一罐新嘅
「講個故事比你知…」凌御生接過啤酒之後飲咗一啖
「好呀～」夏巧莘微笑道
「喺一個男仔細細個嗰陣，佢屋企係一個小康之家，有爸爸，有媽媽…但佢爸爸好忙，都唔得閒理佢，但唔緊要，因為仲有媽媽喺度關心佢…」凌御生講到呢度，突然深呼吸，「但去到某一日，佢媽媽唔再喺佢身邊…屋企只剩低呢個男仔同佢爸爸…但佢爸爸係江湖中人，要忙江湖嘅事，從此以後呢個男仔為咗引起佢爸爸嘅注意，決定咗要曳啲，要做壞學生。就算比爸爸鬧都好，打都好，都唔緊要…」
「你宜家大個，可以去搵媽媽呀～」夏巧莘側着頭微微一笑
「去天堂搵佢？」凌御生笑一笑
「Sorry...」夏巧莘一臉抱歉
「唔緊要。」凌御生搖搖頭，「我爸係江湖大佬…有成班兄弟跟佢做嘢。我係佢個仔，但就冇江湖事咁重要。」
「其實佢應該都好錫你。」夏巧莘微笑道


「係掛…我再壞都好，其實都係想佢關注下我…冇咗我媽之後，屋企就再冇人關心我啦～」凌御生稍稍挺一挺直個人坐，然後又再將瞬間飲完嘅啤酒罐放到旁邊
夏巧莘突然一個想攬實凌御生嘅感覺湧上心頭，下一秒就已經向左邊移，然後伸手攬住凌御生
凌御生被夏巧莘突如其來嘅舉動嚇咗一下，但好快就露出微笑
「做咩呀？」凌御生柔聲問道
「唔係冇人關心你㗎…」夏巧莘嘅下巴靠喺凌御生嘅博頭上，「我關心你…」
「你咁快就飲醉啦？」凌御生將未開同飲晒嘅啤酒放到自己嘅左邊
「未～」夏巧莘將啤酒罐喺凌御生耳邊搖咗兩下
「咁快就飲晒一罐啦又…」凌御生同夏巧莘對望着，然後伸手拎走咗夏巧莘手上嘅空罐放到左邊
「平時番工日日飲，點會咁易醉…？」夏巧莘微微一笑
事實上平日夏巧莘真係好易醉，以啤酒嚟計嘅話，飲三、四罐就開始醉，宜家係處於開始醉嘅狀態


凌御生冇避開，只係由得夏巧莘攬住佢
「做個壞學生都幾好呀～」夏巧莘鬆開手再次坐好望住前方，手上又再拎住一罐新開嘅啤酒，側着頭頭輕輕靠喺凌御生嘅博頭上，「唔洗擔心自己嘅一言一行，可以做自己…」
「你都可以做自己㗎～」凌御生望住夏巧莘，夏巧莘頭髮嘅香味傳入凌御生嘅鼻中
凌御生自己笑咗一笑，好似彷然大悟一樣，原來啲人口中所講嘅「女仔嘅香味」，就係咁樣
「哈…做自己？」夏巧莘冷笑一聲，「太難啦…喺呢個時候，要做自己嘅話太難，會破壞本來就有嘅美好形象…」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link