【港產片系列】獵殺影評人: 第十四回

「呀……」

毛里平被後腦傳來的劇痛弄醒。

他第一眼看到的是Suki，以一張流淚笑臉向著他的Suki。

Suki滿臉喜悅：「你醒嗱？我去叫醫生！」

說完她即伸手按床頭側的呼叫鈴。





毛知道這裡是醫院，而且是在一間豪華的單人病房中。

第一個感覺是自己並沒有死去。

剛才發現自己死了變成鬼、看到Suki和總編輯親熱，原來通通都只是一場惡夢。

真好，自己還未死，只是在做夢罷了！

毛大喜道：「我…我無死到？！」





Suki忍不住上前抱緊他：「係呀！你無事呀！你話過呢一世都唔會離開我㗎！」

毛還想說話，但感到喉嚨非常乾涸：「水……」

Suki立即倒了一杯水遞給毛里平。

這時醫生剛好入房，待毛飲過水後便替他檢查。

檢查過後，醫生對毛說：「你雖然跌穿咗個頭，但無傷到個腦，應該唔會有任何後遺症，而家傷口開始埋口，可能會比較痛，等埋咗口就唔會痛㗎啦。我哋觀察埋今日，如果無乜事一、兩日後就可以出院。」





Suki：「唔該晒醫生。」

毛待醫生走後立即問：「跌穿頭？我唔係俾槍打中嘅咩？」

Suki笑著答：「原來一切都係誤會，鐵漢根本無諗過殺你，而家呢間私家病房都係佢出錢㗎。」

毛：「件事究竟點㗎？快啲講我知啦！」

Suki：「其實鐵漢係想揾你幫佢寫劇本，因為佢近年嘅戲都只係大陸收得，香港票房完全唔掂。所以佢最近揾咗肥精導演佢嘅新戲，想拍返一套地道口味重啲嘅電影俾香港嘅觀眾睇。」

毛：「咁關我乜嘢事？做乜要追殺我？」

Suki：「你聽我講埋先啦，唔好儳亂歌柄！鐵漢同肥精拍戲期間，鐵漢透露想揾一個擅長寫地道嘢，但又想視野國際性少少嘅編劇成為佢公司嘅固定班底。肥精聽完佢要求就推薦咗你俾佢，仲話你本來好有潛質，好識捉香港人口味，但係寫出嚟嘅嘢，外國觀眾一樣睇得明，不過後來意氣用事離開佢公司，跟咗啲要求大陸化「河蟹」劇本嘅導演，搞到埋沒咗潛質。」

毛：「肥精推薦我？仲讚我寫嘅嘢？」





Suki：「係呀！睇嚟佢都好賞識你，同埋聽鐵漢講，佢對當年對唔住你嗰件事，都覺得內疚㗎。」

毛：「聽鐵漢講？你哋傾過偈嚟呀？」

Suki：「喺你暈咗嘅時候，鐵漢將成件事嘅前因後果都講晒出嚟。佢當日同成班兄弟喺你屋企附近拍完戲，諗住求其揾間茶餐廳醫肚，點知咁啱撞到你，所以咪叫住你，想同你傾下幫佢做編劇啲嘢，但係你以為佢想郁你，轉頭上的士走咗。」

毛：「佢點知我個樣㗎？佢揾我做嘢，點解唔打電話俾我？」

Suki：「首先，你個樣喺影評嗰欄度日日都有登出嚟，梗認得你啦！而且你喺影評度唱咗佢咁多日，佢更加會留意你個衰樣啦。仲有，佢本來諗住等肥精導演套戲拍完晒先揾你傾，因為趕住埋尾，只係咁啱見到你先想同你講咗先。而我哋喺朗豪坊見到嗰個武師，本來係去嗰揾朋友，點知又咁啱見到你，所以想同你打聲招呼，結果俾我重創咗。」

毛：「想揾我傾嘢啫，唔使兇神惡煞咁呀？」

Suki：「大佬呀！電影話就話係第八藝術啫，但鐵漢佢地全部武師出身，粗人一名，講嘢不嬲都係粗聲粗氣㗎啦！」





毛：「我明明喺影評到寫衰佢，佢咁都重揾我做編劇？」

Suki：「佢同我講，話入咗行幾十年，呢幾年又已經收晒火，娛樂新聞炒作仲點會令佢放喺心度呀？同埋佢因為讀書少，特別尊重你呢種文化人，只要真係做到嘢、幫到佢，兜口兜面鬧佢都仲得。我仲問埋佢有無話過要收你皮？佢話，成班麻甩佬飲大幾杯，緊係乜嘢說話都講得出，點可以當真㗎？」

毛：「咁酒店火燭、用槍射我又點解釋？」

Suki：「全部都有得解釋，不過都幾複雜，你等我慢慢講。我哋嚟澳門前咪打咗俾總編輯嘅，總編輯收咗線後打俾鐵漢，嗰一刻佢已經知道成件事係一場誤會，但就無同我哋講，仲叫我哋等佢同鐵漢傾咗先。其實，差唔多同一時間，鐵漢都嚟咗澳門拍戲，所以總編輯同佢講我哋喺澳門嘅時候，佢即刻問咗你住邊間酒店，要揾你解釋清楚。但係佢到咗酒店，揾唔到你入住紀綠，想打電話俾你，你個電話又校咗去飛行模式，所以就走咗。之後嘅酒店火燭，已經證實咗係一場意外。」

毛：「總編輯個仆街，令我哋驚咗成晚，仲想搞你㖭，正冚家剷！」

Suki：「我都唔知總編輯點解要咁做…佢已經離開咗酒店，但唔知去咗邊？而家都未揾到佢……講返鐵漢先，佢半夜喺戀愛巷附近拍緊戲，個鏡頭係佢喺街上面揾緊疑犯，啲攝影機Set咗喺其中一層樓嘅天台向住下面街攞遠景，而我哋又係咁啱喺戀愛巷轉出嚟，以為鐵漢要殺我哋……其實佢用嗰把係道具槍，有聲有火無彈頭，你當時見到佢開槍，本能反應向後避，但唔小心跌低，撞穿咗個頭暈咗……成件事就係咁啦！」

毛：「咁點解鐵漢一路唔出聲呀？淨係用枝槍指住我個頭！」

Suki：「佢哋老一輩藝人，習慣導演唔嗌Cut唔會停㗎！肥精嗰時掛住食雲吞麵，都無望住個mon，所以無嗌到Cut。」





毛：「肥精……（下刪一百字粗口）」