【港產片系列】獵殺影評人: 第三回

很多影評人家中都會收藏大量影碟，但毛里平只有不足十張。

因為99%的電影都受過他批評，又怎好意思去買這些影碟？

被他大讚的電影，票房都差得連出碟的機會也沒有。

他坐在客廳中，55吋電視在隨意播放著24小時新聞，眼沒焦點的對著隔鄰幾乎空置的影碟架，心中想著目前的處境。

他曾經聽過在七十年代，某部電影票房慘淡，片主賠了大錢，於是怪罪某影評人落筆太狠，結果找人斬斷影評人雙手，並輪姦了他妻女。





這是電影圈流傳很久的一個故事，說的人多，但沒人說得出事件中的主角是誰？在網上也找不著相關新聞。有說那個年代，有錢就可把事實真相掩蓋。不過就如都市傳說一樣，也不知道是真是假。

無論怎樣，他都不想成為第一位證實被斬的影評人。

雖然已不斷著自己冷靜，還是制止不了腦袋在胡思亂想。

「好彩未婚，無妻無女……」

「屋企無女人，咁會唔會…輪姦我呢……」





「收我皮意思係殺咗我，定只係令我無得再寫影評呢？」

「好唔好返大陸避一避？」

「仲交唔交稿好呢？」

第二天，在客廳沙發醒來時已是下午，梳洗了一下就準備落街吃「早餐」。

他發現自己精神十分差，到街口快餐店的途中，腳步虛虛浮浮的。





忽然，他眼角看到對面街有十多個大漢的身影。

定睛一看，人堆中為首的正是巨星鐵漢，身邊的十多人中，他認出有幾位是常在鐵漢電影中出現的龍虎武師。

他嚇一大跳，腳步不自覺停了下來，汗水在不到一秒間於身體傾倒出來，弄得上衣和頭髮完全濕透。

鐵漢也看見他，立即手指著他大叫：「咪郁，唔好走！」

「咪郁，唔好走！」每一個都字傳入毛里平內心深處，成為他轉身狂跑的原動力。

不敢回頭一口氣跑到街尾，剛好一輛的士駛出路口，毛想也不想便拉開車門上車並大叫了一聲：「開車！」

司機即時踏油門離去，毛向窗外看去，鐵漢一伙原來離自己上車的位置只有十步不到的距離，十多道目光正怒氣衝衝的望著自己。

若不是剛好有的士，後果不堪設想……





在旺角下了車，毛的頭髮和上衣仍然濕透，引來不少途人注目。

不知怎算好的他，只好致電Suki，希望可找到解決方法。

「身痕，點呀？」電話裡頭傳來Suki甜美的聲線。

「Suki，我頭先落街俾鐵漢同佢班手下追殺，好彩大命先走得甩！」

Suki：「點會咁㗎？無理由大街大巷郁手咁明目張膽㗎？」

毛：「我而家都仲係好驚，究竟妳點知鐵漢要收我皮？成件事究竟係點㗎？」

Suki：「其實我都唔係知得好清楚，尋晚我將你編稿排完版交俾總編輯睇，佢望一望你個影評，就同我講話收到風你早排好出位咁寫鐵漢陽痿嗰啲嘢，攪到佢好嬲。早幾晚佢飲醉酒，講到明要收你皮，在場好多人都聽到。」





毛：「咁妳總編輯有無話用乜嘢方法可以令鐵漢放過我？」

Suki：「咁我都有問過佢點算？佢話叫你小心啲就得！一來鐵漢可能飲醉酒亂講嘢，二來佢真係郁手就人人都知佢做啦，點會咁蠢呀！」

毛：「但而家佢真係郁我啊……」

Suki：「唉……其實你寫鐵漢嗰陣，我都有諗過叫你收斂少少，因為我都聽過佢好記仇，亦都聽過有啲得罪過佢嘅人嘅下場……但係總編輯話你啲稿回響好大，越寫得激讀者越鐘意，仲叫我搵埋心理學家撥火，將件事有咁大攪咁大……」

毛：「吓？咁你哋即係推我去死啫！」

Suki：「咁又唔好咁講，你都因為呢件事而大受歡迎，仲加咗稿費㖭。始終決定咁樣寫鐵漢嘅係你自己……不過發生咗咁嘅事，我都好唔安樂……」

毛里平也知道推自己上絕路的不是別人，而是自己：「而家點算呢？好唔好報警呢？」

Suki：「報咗警都無用㗎，你又無證據，你告佢嘅話，佢隨時做好晒不在場證據先揾人買起你都仲得，佢咁有錢，真係大晒㗎！」





毛：「唔通真係無晒辦法？佢哋喺我屋企樓下追我，而家我連屋企都唔敢返呀。」

Suki：「咁呀……不如你講俾我聽你喺邊？我而家嚟揾你一齊想下辦法啦，好唔好？」

毛：「好呀，陣間喺朗豪坊五樓美食廣場等。」