讀足六年，比人蝦足六年: 5.神一般嘅女孩

5.神一般嘅女孩

    4年前...
××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××

   『你識我咩？』我望住扶住我嘅佢，佢就好似頭上有個光環嘅天使，呢d叫咩呢...女神光啊！

   『梗係識你啦，我地同班架。』我當然知道我地同班啦，問題係佢地都唔會注意到我，你，係第一個會留意我嘅人。

    佢講完就轉身翻去上堂，但係呢個係最好機會，比我去同佢有更深嘅交流，可能會係唯一嘅機會...因為我怕佢翻到去就唔得閒再理我。





   『等陣！』我鼓起好大嘅勇氣留住佢。

   『做咩啊？』佢有d疑惑咁望住我。

    我一定要搵d野同佢傾....死就死啦。

   『你呢....你叫咩...咩名啊？』我問到口疾疾咁，場面好尷尬，我仲驚佢拒絕回答。

    點知佢冇直接答我，反而笑一笑就離開左。





   『你遲d咪知道囉...哈哈。』

    點解嘅？雖然佢好普通，但係係我眼中，佢好完美。

    唔同，呢d就係初戀嘅感覺？係咪啊？

    我翻到班房，果然，冇人過黎問我選拔順唔順利，個個都剩係去關心果個咩足球王子，雖然我聽講佢真係踢得好勁。

    連啱啱扶住我嘅女仔都同足球王子有講有笑咁，搞到我好葡萄，真係一啖砂糖一啖屎。





    不過我相信佢唔會咁膚淺，佢唔係一個剩係重視外表嘅女仔，佢唔係！

    應該...

    我同佢識左幾耐呢...幾分鐘？

    我憑咩去管佢呢？我可能連關心佢嘅資格都冇啊！我可以點？唯有睇住佢地係度卿卿我我，真係好心up。

    唉...冇計，鬼叫我樣樣都及唔上人地咩，你唔鍾意我都係應該架。我唔會怪你...雖然你可能根本唔care。

    最尾，午膳完之前我都冇同佢傾過一句，我就咁失去左一個機會...嗎？

    未必，我仲未知佢個名，我仲有機會！我唔會認輸，呢個就係我！就好似我從來都唔會放棄足球咁，叫我算把？冇可能！





    佢話過架，我遲d會知，我一定會知，你叫咩名。

    我主動過去，打斷佢同足球王子嘅對話。

   『我仲未知...你叫咩名啊...我叫...』我吞吞吐吐咁講。

   『我知你叫臨子廷，但係呢，你無端端打斷我地講野，都幾冇禮貌囉...』足球王子望住我，露出『唔滿意就黎打9我』嘅眼神。

   『我唔係叫你啊，我叫佢啊。』我指住果個女仔。

    佢用溫柔嘅眼神望住我...望左幾秒先講野。

   『阿希啊，我陣間先搵你傾啊。』佢同足球王子講左一句，就轉頭同我講野。

   『你真係咁想知我叫咩名咩？』佢望住我講，佢會唔會覺得我好怪呢？





   『係...係啊。』我緊張到就瀨。

   『哈哈，你好搞笑啊，我呢...』搞笑？我唔係黎搞笑架，定係佢派緊好人卡比我？

   『我叫劉意琪，叫我阿琪得啦。』我得左啦媽咪！！！

   『我叫臨子廷啊，你叫我阿廷又得，叫我阿Jeff都得架！』我興奮得滯，語氣有d激動，搞到場面好尷尬，好想搵洞捐。

   『好啊，阿廷！』

   『哈哈...阿琪！』
 
    就係咁，我識左呢個女仔，一個令我鍾意一世嘅女仔。





    阿琪...

    我真係好鍾意你...
 
    唔知你仲記唔記得我呢？

    我叫...

    臨子廷。