讀足六年，比人蝦足六年: 3.魔爪
3.魔爪
『屌！真係黑仔，咁都比人罰。』我心入面係咁埋怨，仲諗緊點樣可以整佢一鍋，但係我都係講下，從來都唔會做，唔通真係想被退學咩。
講白d，姐係我驚。
我比人罰到差唔多一點幾，唔好話食飯，真係打...都唔夠時間，所以我去『紅樹林』買左個撈麵加大檸。
你問『紅樹林』係咩？我地學校小食部，同樹林係一d關係都冇。
至於大檸係咩？姐係大包嘅陽光檸檬茶。
雖然講真就一d都唔好食，仲要貴到hihi兼唔夠飽，但係鬼叫我比人罰咩。
我坐係樓下，食完野，先至行翻上課室。
費事d野食比班友M9曬。
翻到課室，見到冇老師，我就坐低，係位到玩陣電話。點解？係學生都鍾意咁架啦，唔好問點解。
『喂！你係度做咩啊？』一位身材矮小嘅男同學大叫，拿拿拿，我冇歧視架，係照實講咋，更何況我只係唔記得左佢叫咩名所以先咁叫。
『頂！你靜d啦！』我真係好L不滿佢，明明自己又唔係咩乖乖仔，又要做偽正義魔人。
我將部手機放左入褲袋，諗住同佢理論（講笑），但係呢，呢個時候我部手機就作反啦。
我行左過去，但係君子報仇，十年未晚啊嘛，我就十年後先翻黎搵你條契弟，於是我又走開左。
『叮噹～叮噹～』姐係咩啊？上堂囉。
我執好d書之後就就自己一個行左過去6樓上堂。
『哇～好正啊！』『痴線，佢食咩大呢？』『雨迎妹妹我要做你隻兵啊！』
一大班男同學企左係6樓走廊度，唔知睇緊咩。以我唔執輸嘅性格，當然要睇埋一份。
原來係我地form嘅女神林雨迎，佢係6樓走廊度經過。
『屌靚女有鬼用咩。』我細細聲咁講，因為講得大聲我就走唔出6樓。但係我講就係咁講，口裡說不，身體就...
其實佢又真係幾正，睇落又sporty又陽光，身材係我地學校都算係世界級。如果佢係我條女，應該都幾爽，諗起佢同我拖住手行，人地用羨慕嘅眼光望住我，真係咩彩都攞翻曬。我咁大個仔，終於可以威翻鋪。
臨子廷，你係得嘅！
『你ff完未啊？』頂你老師啊！真係李老師。
『對唔住，對唔住。』連老師都咁口臭嘅？積翻d口德啦lap sap。
過左唔L知幾多個一分鐘，終於落堂了。上咁耐中史堂，真係悶到訓著都搞唔掂。
我跳跳紮咁翻班房，當然路上都有d人用奇怪嘅眼神望住我，唔通，我太靚仔？唉屌...靚仔真係多煩惱。
我帶住憂鬱嘅眼神翻班房，希望佢地唔好鍾意我啦（笑），路上d女同學全部都擰轉面笑，佢地應該係崇拜緊我呢個憂鬱嘅眼神。
翻到班房之後，就到班主任堂，我就越黎越緊張，點知佢一早就到左班房。
我地討論左一陣旅行日嘅地點同活動之後（我冇份討論），佢就走左。
老師唔係度要做咩啊？玩手機囉！唔係咩啊。其實都放左學，我可以出左去先玩嘅，但係好似我呢d瀟灑嘅浪子，就係要係學校玩，雖然跟本冇人搵我，但係我都鍾意攞部手機出黎睇wallpaper，吹咩？
『yee...我部手機呢？』我搵一搵我褲袋，咩都冇。唔L係啊嘛。
雖然部手機都係幾年前嘅三叔手機，但係我冇錢換架，所以搵唔翻就大檸樂。
於是我就開始急啦（唔係急尿），我都唔知幾時唔見左部手機，搵鬼搵馬咩。
書包、櫃桶都搵過，褲袋都搵左5、6次，都仲係搵唔到。
『yee？臨子廷你唔見左d咩啊？』又係果個死矮仔，啊！唔係，係身材矮小嘅同學仔。
『關你咩事啊短人。』我好L唔鋸佢。
『搵手機啊？你唔見左部手機咩？』仆街！你又知？
『係啊，咁點啊？你攞左？』最好唔好比我知係你攞，如果唔係...我...我喊架。
佢指一指住隔離張空枱嘅櫃桶，我就過左去搵，真係好L似比主人叫去執木棍嘅狗，不過我又點會係狗呢？為左我部手機嘅幸福，冇計啦。
我過左去搵，又真係搵到我部懷舊三叔手機。
我真係嬲到仆街，我特登行過去個短人隔離，大力拍左一下枱，就跑左出班房。
『唉屌我隻手好痛。』早知唔拍咁大力，隻手痛到hihi，鬼叫我咁弱雞雞咩。不過依然無損我美男子嘅形象。
我跑到走廊盡頭就開始喘氣，體力不支。
點知...
一隻屬於女性嘅手伸左出黎，唔通，屬於我嘅緣分終於黎到？
點知一抬頭就見到視藝科老師，頂。
『你份sba未畫完！上黎畫埋佢！』唔係掛，咁我點翻屋企啊？
但係都冇計，走佬佢同班主任講，仲死。
所以我都係翻左去畫畫。
我畫到一半，就見到門外有個熟悉嘅身影，原來係吳確廉同佢個廢物朋友，條lap sap想點啊？又想笑9我？
『咩料啊？』我一開門就黎個下馬威。
『屌，咁惡做咩，黎安慰你啊！比人蝦都唔出聲嘅？』貓哭老鼠，咪又係你訓練出黎嘅。
『哦，冇事啦，條友真係小學雞。』我逞強，唔想比佢笑，不過佢近排做咩轉左死性？
『冇事就翻去畫畫啦，bye。』講完佢地就走左。
屌，日日都係我比人hup，我第時一定搵佢地報仇。
不過我又真係幾期待之後嘅旅行日，因為佢地話踢波，開正我果飯。
Jeff，it's show time！！