人要惡過車！: 第七十二章

耀哥通知我啲零件嚟咗車房，咁我就叫堯姐搵文青妹妹，拎架車去整。

「Cherry？妳點解喺度嘅？」曉彤對於出現喺車房嘅Cherry表示奇怪。

「Err⋯⋯我⋯⋯」

「妳一定係嚟搵我玩呢，不過妳又識嚟哩度嘅？」

「我話比佢知㗎嘛。」好彩堯姐幫手解圍，唔係都幾大鑊。





之後佢哋三個女嘅就入去冷氣房，淨低我同耀哥喺出面。

「其實嗰個𡃁妹邊個嚟？」

「咪你個女個同學。」

「就係咁簡單？」耀哥半信半疑。

「仲有上次係佢撞我嘅。」





「咁唔怪得知爆頭燈爛泵把啦。」

「所以幫幫手，盡量整返靚佢，之後入我數就得。」

「Ok啦，我盡整。」

正當我同耀哥夾手夾腳維修緊架DC5嗰陣，上次架AP2又嚟咗，而我最估唔到嘅係S2000個司機。

「師傅，上次換偈油同換零件加埋幾錢？」





「齊頭三百啦。」

「雯？」

「咦，阿僖？」

「乜原來架S2000係妳㗎。」

「我都係啱啱買佢返嚟喳嘛。係喎，你都換咗車呀。」阿雯指住架DC5。

「我係換咗車，不過唔係哩架。」

「咁你賣咗我比你架車？我嗰陣叫你好好照顧嗰架車㗎喎。」

「梗係無賣啦，我邊會出爾反爾。」





「咁就好啦。」

正當我哋傾計嗰陣，堯姐靜靜雞行咗我後面攬住我。

「哩個係你女朋友？」阿雯問我。

「我係呀～咁妳係？」我未答堯姐已經搶答。

點解我好似感覺到殺氣同聞到火藥味嘅？

「妳放心，我係佢中學同學啫，唔會搶走妳男朋友嘅。」

再比佢哋講落去應該開拖都似。





「好啦，我走先，下次再傾。」阿雯從耀哥手上接過收據。

阿雯走咗之後，堯姐仍然攬住我唔放。

「唉喲，聞到好大陣醋酸味添～」

「哼。」

「唔知啲醋味喺邊度傳出嚟呢？」我捉住堯姐其中一隻手聞。

「哼，唔理你呀。」今次到我攬返堯姐轉頭。

「食完酸嘢食返啲甜嘢啦。」我錫堯姐塊面一啖。「夠甜未？」

「哼，苦嘅。」





「苦？無理由嘅～」今次我再錫耐啲，佢嗌停先算。

過咗半分鐘之後，堯姐率先開聲。

「嘻，甜啦甜啦，曉彤佢哋望住我哋啦。」堯姐塊面又紅曬。

「好啦，咁我繼續整嘢啦，妳返入去涼下啦。」

堯姐入返去之後我就繼續幫耀哥整架DC5。

「好嘢喎。」耀哥不懷好意咁笑。

「吓？」





「大家男人明嘅～」

究竟你噏乜呀？我唔明喎。

經過維修之後嘅DC5，應該睇唔出係撞過嘅。

「交比你試車。」

「Ok。」

喺附近兜圈之後，翻嚟接堯姐同文青妹妹。

「唔該你呀哥哥。」

「唔好有下次啦，考到牌先揸都未遲呀。」

「嗯。」