人要惡過車！: 第六十七章

第二日要返學，喺返學途中，堯姐問咗我一個問題。

「B呀，其實你架車有冇得播歌㗎？」

我望住個寫住日文嘅車機，完全無從下手。

「唔知喎，我都無用過。」

「咁不如換咗佢啦，坐車無得聽歌好悶㗎。」





「哦，咁好啦。」

所以上堂嗰陣Whatsapp耀哥，睇吓佢有無車機，好好彩咁佢車房又真係有貨，咁我哋放學就去裝啦。

去到車房，有架白色嘅S2000喺入面。

「僖仔嚟啦？」

「Hi。」





「阿女都嚟咗喺度呀，你哋入去坐下先，我執埋少少手尾。」

我哋行入去，又見到耀哥個女做緊功課，而佢又喺度苦惱中。

我同堯行埋去睇睇，結果開正堯姐嗰範，喺我好憎嘅歷史嚟。

喺堯姐教緊佢嗰陣，我同耀哥出去裝車機。

哩部車機用英文，起碼我睇得明先，同埋有藍芽，駁電話播歌應該方便好多。





裝好之後，我行去望堯姐，我想講堯姐做老師應該唔錯。

「嗯？望咩呀？」堯姐問我。

「無呀，坐車有得聽歌啦。」

「正！下次見啦曉彤，ByeBye。」

話說車機嘅錢耀哥話佢一陣直接搵阿爸計就可以。

我幫堯姐部電話用藍芽連好部車機，就遞返部電話比佢。

「得㗎啦？」

「係掛，你試試啦。」





堯姐㩒兩㩒個電話，車內喇叭就傳來音樂。

「Yes！有得聽歌嚕。」

有得聽歌咁開心㗎咩？引擎聲同喉聲仲好聽啦唔係咩？
不過既然堯姐鍾意就得啦。