人要惡過車！: 第六十五章
上車之後，堯姐一路喺度諗嘢。
「諗緊咩呀？」我問。
「唔知係咪我心理作用，我硬係覺得你架車好似有啲嘢唔同咗咁。」堯姐繼續喺度諗。
「其實⋯⋯」我未講完已經比佢打斷咗。
「不過唔緊要啦。係喎啱啱Ophelia搵我去行街呀。」堯姐同我講。
「咁多活動嘅你？哈哈。」
「邊似得你，日日喺屋企瞓覺。放心啦，唔會扔低你嘅。」
跟住又揸返架車落葵芳，泊低架車，搵埋Ophelia。
「Hi，等咗好耐呀？」堯姐問。
「唔係呀，我啱啱到喳嘛。」
結果我跟住佢哋兩個，簡直接近行齊曬全部賣衫嘅舖頭，之後，我哋嚟咗一間開喺商場好入面嘅舖頭。
「隨便睇⋯⋯⋯⋯僖哥哥？」
「噢，Hi。」
「哦？你哋識得㗎？」堯姐用一個好好奇嘅目光投向我。
「嗯，我哋係朋友，睇嚟妳就係僖哥哥嘅賢內助啦。」Ella答。
「嘻，你又知？」堯姐笑住講。
「哩位小姐係自己孭住袋，但係妳就無拎袋嘅，反而僖哥哥孭住個女裝嘅袋喎，所以我先大膽假設啫。」Ella好有自信咁講。
嘩，這觀察力有點兒強呢，強得有點可怕呢⋯⋯
「係呢，妳係哩度嘅老闆？」我問。
「係呀，同朋友夾分做啲小生意啫。」
咁後生就創業，睇嚟佢屋企應該幾有錢呢。唔係，係一定好有錢，唔係點會可以有兩部RX7呢。
「做老闆真係好呢。話時話，你架86無事啦嘛？」
「無事啦，哥哥整返好啦。」
「86？」原本睇緊衫嘅Ophelia擰頭望過嚟。
「嗯嗯，妳對車都有研究㗎？」
「Err，識少少咁啦。下一代86好似改turbo喎。」Ophelia話。
「我⋯對車唔係好熟㗎喳⋯」Ella話。
「其實呢，佢係揸AE86。」我同Ophelia講。
「⋯⋯」Ophelia好驚訝，唔知點比反應好。
「我哋返嚟啦。」「我哋幫你買咗嘢飲啦。」門口傳嚟兩把女聲。
「唔該你呀，洛怡。」Ella話。
「搞錯呀，我都有幫手㗎。」另外個女仔講。
「係啦，唔該你呀，慧妍。」
「哼！咁就差唔多。」
「佢哋就係哩度嘅另外兩個老闆，佢係洛怡，佢係慧妍。」Ella同我講。
「Hi。」洛怡同慧妍異口同聲咁講。
「Hi，我係阿僖。」講完之後堯姐行埋嚟撓住我隻手。
「Hi，我係阿堯，佢係Ophelia。」
「Hi。」
究竟有咩比聽3個女人圍爐傾計更加慘？就係聽住5個女人圍爐傾計啦。
接下落嚟，我聽咗唔知幾耐佢哋圍爐傾計。最後，我瞓著咗⋯⋯