人要惡過車！: 第五十七章

「喂，B你喺邊呀？」

「西貢。」

「無啦啦喺西貢嘅？」

「啱啱撞到Ophelia，之後鬥咗轉車。」

「日光日白鬥車你癡咗線？」





「無事嘅，打嚟搵我有事？」

「諗住一陣叫你嚟車我。」

「哦～咁喳嘛，幾點呀？」

「你預4點啦。」

「Ok。」





我望望隻錶，兩點幾，咁做咩好？

我上返車，諗住周圍行下。

轉返出去西貢公路，但唔上橋，去科大嗰邊。

見到清水灣塊牌，梗係追住行啦。

第一轉大清行返慢啲，熟習返條路同check返有無人捉。





出返嚟調頭，再片入去，今次飛100都無乜問題，都仲安全，咁我都廢事再踩咁盡，萬一炒就煩。

飛兩轉都未夠鐘咁點？梗係又泊低架車，行落沙灘hea。

你問睇唔睇女仔？睇嚟做乜呀，有屋企嗰個，即係行緊街嗰個呢，已經好開心啦，況且睇完又唔會係你嘅，係咪咁講先。

喺沙灘瞓咗一個鐘，之後就去商場接佢哋。

「無買嘢嘅你？」

「有呀，你睇。」堯喺手袋拎咗個汽車香薰仔出嚟。

「無啦啦買香薰嘅？」

「想架車香啲囉，坐嗰陣舒服啲。」





「海洋味？」

「醒目。」

話時話，又真係幾香㗎喎，唔係講笑。

「你好好對人呀，睇吓人哋幾為你着想。」

「家姐講得啱呀。」

「唔洗你哋講我都會。」

「係至好。」





車咗嗰兩姊妹返歸，我哋返咗屋企抖。

瞓到夜晚，我哋落街食飯，食完再瞓過。