人要惡過車！: 第四十一章

「做咩呀？」

「Jenny話佢哋走先喎。」

「咁我哋去邊？無理由咁快返屯門㗎？」

「啱呀，整蛋糕都唔洗咁早。」

「咁再hea下先啦，我諗到去邊。」





之後我就同堯去攞車。

「去邊呀？」堯好奇咁問。

「一陣你咪知。」

我出返彩虹交匯處，轉上清水灣道。去到彩雲邨對出，有架啞黑色嘅新MX5衝緊落山，我無理佢，繼續上山。

之後上到安達個路口，我望望後鏡，見到架MX5喺我後面，咁我揸快少少，廢事阻住人。點知佢又唔爬我，結果我越揸越快，去到鄭植之附近嗰隻轉左落西貢公路彎，我收一收油，但架MX5完全唔收咁劈入隻彎。





咁一直都放唔走佢，無所謂啦，架MX5就跟到我入西貢市中心，泊低架車，之後MX5個司機就落咗車。

令人最估唔到嘅係MX5嘅司機。

MX5個司機係個妙齡少女嚟，應該同我差唔多大，一把烏黑嘅長髮，純黑色T shirt同半截裙，再加上一副高傲嘅表情，簡直係可遠觀而不可褻玩而。

佢慢慢行過嚟，之後哼咗一聲。

做乜鳩？





「仲以為有幾勁添。」佢用一個鄙視嘅眼神望住我。

做咩無啦啦嚟咗個癲婆？

「做咩唔出聲呀？」

「其實你究竟想表達啲咩？」我直接問佢。

「你咁都唔明？」

「明乜嘢呀？不如你直接講啦。」

「夠唔夠膽同我鬥一轉呀？」佢突然伸個頭埋我耳仔邊，細細聲咁講。

講真，佢哩下舉動同語氣令我寒一寒。





「樂意奉陪。」

「咁攞個電話嚟啦。」

「比你做乜？」

「你唔洗理，攞嚟就得。」

我又真係on99咁比咗佢，之後佢打電話比自己，再比返部機我。

「細節我遲下Whatsapp你，係咁先。」佢轉身就走。

「喂，你叫咩名呀？」我叫佢。





佢無擰轉頭，就咁講咗句。

「贏咗話你知。」