(愛上你系列完結篇)愛過她，還是愛妳: 4
「喂呀，做咩啫」「咔...」身邊有幾個人在拍照，亦都有人在拍片，喂甜甜...
「甜甜，我係...」「傻瓜，起身先啦，無啦啦咁求婚，嚇死我咩...」「咁你肯唔肯啫甜甜?」「傻瓜傻瓜傻瓜!，我謝樂甜要嫁你傻瓜趙德銘，咁得未?」樂甜滿臉眼淚地笑著說這句，實在是太可愛，對不起啦新賢，我截了你糊先去求婚!!
「不如我地係度再影幾張相囉?」「好!」樂甜的提議當然沒有拒絕的空間，所以我們在晴空塔逛到關門為止，而回到酒店的時間已經是十二點，樂甜她再次將我們的相片上傳到Facebook，還tag了我，之後再發了一個post還有轉關係......
「甜甜表示想與你轉關係為已訂婚，接受?，拒絕?!」我亳不猶豫按下接受那邊，再看看樂甜究竟寫了些什麼，後面沒任何聲音，轉頭才發現樂甜已經站在我身後!
「今日係個好特別嘅日子，因為有個傻瓜，係個好浪漫嘅地方同我做左樣好浪漫嘅野，唔知點解，一見到佢嘅時候已經覺得...佢係同我一生一世嘅人，而且有一種好想比佢保護嘅感覺，趙德銘，老公，呢兩個稱呼唔知係幾時已經拉左埋一齊，好多謝佢，好多謝你老公，願意接受我一切好同唔好嘅野，希望呢一生一世都可以同你係埋一齊，愛你!!」樂甜在Facebook發文，已經吸引了大量留言...
「喂喂喂，咁我地聽日仲駛唔駛見架，凌晨先有D咁爆嘅野，改機票酒店都改唔切呀!!」音羽很快就在貼文上留言，有種酸酸的感覺呢，而其他人卻只是恭喜...
「喂兄弟，你唔等埋我架...」「係你出手慢關我咩事...」很快就回復了新賢，而樂甜已經累得睡在我身邊，我亦拍了張照片，打了一段文字，放到Facebook!
「大學畢業了，身份亦轉為畢業生，而感情生活亦有了改變，多謝你，多謝你樂甜，我嘅好老婆，好女友，係呢幾年入面，我試過唔理你，亦都傷害左你好多次，但你都可以原諒我，原諒我所做錯過嘅野，我知你好辛苦，所以係未來嘅日子，希望可以比我去保護你，比我去寵愛你，等你成為我嘅小公主，小女王，直到今生今世完結，下一世嘅重遇，愛你嘅德銘!!」發佈到Facebook後就睡到天光...
「喂銘，醒啦，天光啦!」「嗯?」「今日芷淇佢地幾點機?」「好似三點到呀嘛，不如係呢度附近行下先?」「好，咦，點解會tag左我?」樂甜因為被我tag了的關係，所以一起來就會看到昨天的動態還有那張睡覺相，而我亦有心理準備...
「喂德銘，點解你要影到我咁樣衰...」樂甜第一時間注意到的不是我的文字，而是下面的那張相片，嘿嘿，其實我覺得沒有任何化妝的，這才是真真正正的你!
「傻瓜，你咁都叫樣衰咁邊個叫靚呢?!」「哼，快D去刷牙食早餐啦!!」樂甜的臉紅了起來沒有再理會我，而這天早上我們沒有任何其他活動，只是在街閒逛...
不過別說...，在酒店附近閒逛多兩三小時，我們的手已經多了幾袋東西，嘩...
「好得意呀!」甜甜走上前，拿著一個頭套戴到自己頭上，變成一隻可愛的小熊!!
「不如影張相...」本想拍照後就算數，但原來這間是禁止人拍照的只好作罷...
「咦，佢地差唔多到，我們放低D野係酒店就去機場等佢地!!」樂甜這邊說完就拉我往酒店的方向走去，而我們亦在飛機抵達前大約十五分鐘到達機場等待...
「芷淇，音羽!!」樂甜看到一堆人的身影便向前方大叫道，而芷淇卻沒有望她...
「喂，做咩唔理人啫...」「哼，你有德銘都夠啦，睇fb真係差D比你地曬死!」芷淇跟樂甜這樣說道，之後樂甜整個臉都紅起來，大家的笑聲開始佈滿整個機場!
「唔理你呀衰人芷淇，我地去酒店先囉?!」一行十一個人，嗯，最後連喬傲旋都參與其中，所以我們一行十一個人便到了酒店，很快我跟樂甜就回到房間待一會!
叩叩...，兩下敲門聲，樂甜就走去應門，是新賢來的...，他來應該是為了......
「你要同芷淇求婚?」「係呀，我地拍拖仲耐過你地，而且我...真係唔可以冇左佢!」新賢把自己需要求婚的原因都說出來，我們當然笑了笑答應了他的請求...
叮...，手機上收到來自大家的訊息，說今天晚上只會在酒店附近用膳和逛逛...
「你地兩個仲跟黎做咩呀，自己去拍拖啦!」音羽掩著自己的眼睛說道，大家都沒去理音羽的說話，便拖著樂甜一步一步走遠，我亦快步跟上去沒有理會音羽。
「音羽你唔跟上黎就唔理你架啦!」定珊向背後大叫，音羽睜開眼快步跟上步伐.!
「聽日嘅行程係咩?!」「聽日我地第一日黎到當然係食野啦，所以就係去築地果邊，跟著就係秋葉原，池袋，東京鐵塔，迪迪尼!」芷淇望著眼前的手機把我們的行程說一次，嗯，還好我和樂甜去的地方完全不在行程之列，明顯她是想過的!
「吓，我想去晴空塔喎!」悅悌很快就表明來意，所以芷淇便開始修改行程......
「不如我地搵日變做兩group人，咁咪搞掂囉?!」「迪迪尼就買哂飛架啦，所以不如最後一日係東京鐵塔嘅行程變做兩group?，想去晴空塔或者其他地方嘅就自己去，最重要係回程果日齊人就得!」「好呀!」大家都同意了這個建議，之後...
「德銘，樂甜，可唔可以出一出黎?!」在閒聯時，新賢便把我和樂甜叫了出去，是說明他自己想的求婚大計，明顯地...他根本沒有任何計劃，只有一隻戒指...
「其實戒指只係幫手，所以你不如趁呢幾日諗下點樣同佢求婚!」「不如去晴空塔?!」樂甜把我和自己的經歷說了一次，而我眼角望到芷淇她開始四處去找新賢。
「芷淇叫你啦，呢兩日好好諗下，睇下我地幫唔幫到手!」很快就回去和大伙兒一齊討論這幾天的行程，而新賢和芷淇的互動亦蠻多的，我想只要真誠求婚就行!
吃完飯大家便分開來行，我和樂甜兩個便走在一條未走過的路上，一直討論我們要開的店，亦希望發掘一些可以放在店內的擺設，直到芷淇突然出現在我們眼前!
「你兩個好坦白同我講，岩岩新賢叫你地出去做咩!」芷淇一直望著我，生怕我好像上次一樣「講大話」，所以我便跟樂甜打眼色，希望不要給芷淇知道什麼...
最後我們都沒有說什麼，只是跟她說會有驚喜，之後一整晚都在談天說地地過!
鈴鈴...，很快就到了另一天，這天是溫泉之旅，所有女生都圍在一起談天說地...
「喂，咁多位小姐行得未?」「得啦煩!!」音羽很快就回應了我，總括來說...今天的活動是男一邊，女一邊，不過有個好處就是跟新賢制訂他的求婚大攻略。
「喂新賢，你有冇諗過點求婚?」去到行程的第二天，當然要先知道怎樣幫忙...
「Er」在車程上面一直跟新賢討論著這件事，還好樂甜幫忙拖著芷淇不讓她過來!
「你兩個做咩咁好傾嘅?」下車的時候芷淇終於走過來問，當然我們什麼都沒說!
走到溫泉那邊才發現要在這裡住上一晚，不知道想當初是誰決定來溫泉的呢?!
「冇得浸溫泉...，唔濟!!」樂甜突然在我面前發小孩子脾氣，真是有夠可愛!
「傻妹，我地下次過黎住好冇?」「哼，你話架!」「你兩個放閃行遠D啦，好曬呀!」「哼，唔理你地呀，銘，我地行果邊!」很快就跟大家分開走，因為這天沒有溫泉浸的關係，大家都分散行動，差不多日落的時候才在輕軌站等齊人回程。
「其實箱根有...」「德銘!!」芷淇拖著新賢走過來，應該是想一起行動，不過...
「芷淇，果度好似有好野買，不如過去睇下囉?!」「喂等陣呀甜甜!」不到一秒，樂甜就把芷淇帶走，而我和新賢就在附近閒逛，再來就是商量一下剛剛未完的事!
「嗯，我地行完啦!」我的錢包君表示好痛...，因為樂甜又買了差不多四袋東西!
「甜甜，你確定可以放得落架何?!」「下，我諗住加錢架!」WTF?，這個老婆有點恐怖，可以找個人幫她做人格改造嗎，洗走她這個可怕的用錢頭腦就可以了。
「咦，差唔多夠鐘啦喎，快D返去集合...」談了很長的時間，終於都到了回程時間，而明天的行程是秋葉原?!，嗯，應該夠我們玩足兩天，可以在那租間房嗎?!
「兩日?!，你地真係...」定珊聽到我們的說話便想回絕，但其實我們的玩意都...
「哼，其實岩岩好差一日，咁就大家自由玩，不過，後日一定要返黎訓!」我，新賢和樂甜聽到第一時間「yeah」了一聲，但芷淇卻望著新賢若有所思地托著頭!