《再見了，還會再見嗎？》: 第67章 – 試後攤位

今年考試都係同以往嘅差唔多，冇話特別努力或者點。
 
雖然今次嘅成績係會影響揀科同分班，但始終都係覺得保持平常心咁去考試先係最好。
 
起碼唔使怕會因為緊張或者其他原因影響咗表現嘛。
 
完咗考試迎接我哋嘅又係一堆沉悶嘅試後活動，維持住返一日放兩日嘅生活。
 
就喺前排，我同Anson做咗好朋友，可能係因為佢同Choco散咗之後要揾人傾訴啦。
 




係啊，佢哋最後都係散咗。
 
冇計啦，咁細個又點會識得互相之間磨合。
 
遇到一啲唔鍾意嘅事，或者難關嘅時候，都淨係識逃避㗎啫。
 
所以除咗冷戰，咪分手囉……
 
其實我到而家都唔明點解Anson會揾我傾佢同Choco嘅事㗎。
 




可能係因為我同佢冇咁熟，可以順便當識多個朋友掛。
 
Anson每晚同我傾嘅內容，都不外乎同Choco分咗手覺得好舒服啦，又或者係有時會因為分咗手而有啲突發性嘅唔開心要人開解下咁。
 
我又唔介意聽佢講佢啲事嘅，咁我平日夜晚除咗温書都冇咩做㗎啦。
 
咁而家又冇書温，咪當同朋友傾計解下悶囉。
 
話說呢，Anson就係社職員嚟嘅。
 




所以佢喺試後活動入面嘅其中一日，要負責做helper搞啲社際攤位俾人玩。
 
咁嗰日我哋就全校都要返學，而阿盈就因為prefect嗰邊要去幫手維持秩序，所以就得返我自己一個喺學校遊盪。
 
前一晚嗰陣，Anson叫我得閒冇嘢做嘅話可以落禮堂啲攤位到揾佢吹下水同玩下嗰到啲遊戲。
 
咁我就當然會去啦，唔通留喺啲班房同啲唔識嘅人玩一日Board Game咩……
 
喺班主任一開始話自由活動後，我就落咗去禮堂揾Anson。
 
「咁快落嚟嘅，唔去同啲中一捉下棋？」Anson一邊笑一邊問我。
 
「玩嘢咩，同啲中一捉棋…… 與其同佢哋捉棋，我不如嚟涼下冷氣好過啦」
 
「哈哈，咁玩唔玩下我呢到個攤位啊？話晒我哋都係同一個社，支持下啦～」




 
「好…… 你都開到聲叫我玩，我實玩㗎喎～」
 
我哋個社嘅攤位係類似一個障礙賽咁嘅嘢，入面有啲繩網啊，又有啲小遊戲玩嘅。
 
不過問心嗰句，其實啲攤位都幾無聊，好似設計俾小朋友玩咁。
 
其他幾個社啲攤位就仲衰，有啲係波波池啦，有啲就係普通擲波仔遊戲。
 
呢啲咁嘅嘢都仲要逼人返學校玩，真係當人小學生咩……
 
我嚟攤位呢邊休息嘅原因，都只係好過留喺班房捉棋咁解，但其實就兩樣都咁無聊。
 
幾經辛苦，終於捱到1點半放學。
 




跟住我哋兩個揾埋阿盈就一齊去食飯。
 
唔好以為我喺成個上晝都淨係痴住Anson啊，有啲時候我都有行開過啲攤位去探下阿盈㗎。
 
因為我前一日唔記得問阿盈係守邊班，搞到我差唔多行晒咁多層先至揾到阿盈喺邊。
 
揾到阿盈之後，我就行咗入嗰到班房。
 
「做咩咁好嚟探我啊，今朝先食完早餐，咁快就掛住我嗱？」阿盈一望到我就笑住咁問。
 
「乜嚟揾你都要原因㗎咩～～」
 
「唓，講你就叻。Anson冇係咁捉住你傾偈咩，咁得閒走上嚟」
 
「點會冇，不過佢一聽到我話嚟揾你，佢仲點敢阻住我啫～」我回應。




 
「唔好講到我好似好衰咁先得㗎……」
 
跟住我同阿盈傾多幾句就落返去禮堂，因為都費事阻住佢做嘢。
 
食飯嗰陣，我同阿盈分享啱啱啲攤位有幾咁好玩。
 
「好彩我唔使玩啫，真係估唔到會咁悶喎」阿盈驚訝地講。
 
乜你上兩年冇玩過㗎咩…… 點解好似今日先知道咁嘅……
 
「原來再過兩日就派卷，有少少緊張添～」阿盈又突然講。
 
「係喎，我都有啲驚添……」
 




「你兩個扮咩驚啫，都攞硬頭30名㗎啦你哋～～」Anson回應我哋兩個。
 
「講到好似你唔係咁！！」阿盈回應佢。
 
乜真係咁易頭30名咩……
 
成績呢啲嘢真係話唔埋㗎囉……
 
點知啲人會唔會因為揀科而勤力咗讀書喎……