《再見了，還會再見嗎？》: 第65章 – 相處模式

返到屋企，我就即刻覆返Anson。
 
「咩事啊？你哋之間相處得唔開心？」
 
「車仔，出嚟食飯喇」媽媽叫我。
 
我諗Anson應該冇咁快覆嘅，出去食完個飯返嚟再算。
 
「爸爸呢？唔使等埋佢？」我問喺廚房入面嘅媽媽。
 




「佢今晚話約咗朋友食飯，所以得我哋兩個自己食咋」
 
咁啫係又會俾媽媽係咁問我平時喺學校點啦。
 
一如所料，由食飯嗰刻開始，
 
媽媽就已經問「今日喺學校點呀？開唔開心呀？」
 
一路答就一路覺得唔耐煩，只係想靜靜地食完餐飯返入房。
 




去到就快食完嘅時候，媽媽叫我坐喺到傾多陣先返房。
 
都開口叫到，唔通我照行返房咩……
 
點知佢問我有關讀書嘅嘢。
 
可能你會問我，讀書啫有咩特別啊？
 
同一個中學生傾偈，話題都離唔開玩同讀書㗎啦。
 




其實咁講又冇錯嘅。
 
但今日唔同嘅係，媽媽認真同我傾揀科嘅事。
 
因為其實自從升咗中三之後，媽媽都已經好少理我讀書讀成點，亦唔會再催我讀書。
 
媽媽對我學業嘅了解就變咗只剩返每年兩次嘅家長日。
 
我覺得咁樣就有好有唔好啦，因為我都唔係幾想屋企人知道喺學校嘅我到底係點。
 
媽：「你好似就快要考試喇喎，考試我就唔擔心你喇，知道你會自動波温好。但係咪就快要揀科喇？」
 
聽到媽媽問呢個問題我都唔意外，因為近排身邊都多同學開始討論緊呢樣嘢。
 
我：「係啊，不過決定㗎好喇我。除咗上次講嗰啲我應該會揀埋額外嗰科數學，而剩低嗰科我就未決定好」




 
話說前排我有揾陳sir了解過額外嗰科數學。
 
唔問都唔知，原來而家分咗做兩科，分別係叫做M1同M2。
 
M1就係有關統計多啲嘅，而M2就係偏向純數抽象啲嘅。
 
陳sir就話呢，最主要嘅分別就係我想唔想睇一大串英文字。
 
咁我就緊係話唔想啦，之後佢就話M2應該啱我多啲。
 
我覺得陳sir識咗我咁耐，應該唔會呃我掛……
 
媽媽：「讀咁多科，你下年要努力喇」
 




我：「應該冇事嘅，都係8科啫」
 
唔知點解會讀8科咁多？
 
咁係因為除咗基本嘅中英數通，同呢科額外數學之外呢，仲要揀多3科選修科。
 
都真係咪話唔辛苦。
 
跟住再同媽媽傾咗個幾鐘，但係我都冇講到而家有同女仔拍緊拖嘅事。
 
可能係因為我本身就習慣唔會同父母分享呢啲嘢啦，所以同佢哋傾偈都只係會講啲喺學校嘅表面嘢。
 
同媽媽傾完之後我就行返入房。
 
好耐都未試過同媽媽傾咁耐偈，感覺好似喺到同一個好耐冇見嘅親戚傾緊偈咁，冇乜媽媽嘅感覺。




 
硬係覺得同媽媽嘅相處方式好似邊到怪怪地咁，愈諗就愈奇怪。
 
我帶住呢個疑問上網查下點同屋企人相處。
 
發現上網啲咩與家人相處嘅技巧都係吹水居多，好多都係叫我哋要多溝通同多聆聽。
 
但諗呢啲技巧嘅人，就根本就冇諗過當父母同子女之間已經好少溝通嘅時候，連傾多兩句計都會好尷尬，更加唔好話要進一步了解。
 
算喇，睇嚟上網啲嘢都係冇乜用，真係睇完就算。
 
係喎，啱啱食飯前覆咗Anson，唔知佢覆返我未呢？
 
我拎起放喺床邊嘅電話。
 




原來Anson覆咗我喇喎，不過都係應咗阿盈先啦～
 
盈：「今日校慶點啊？有冇咩得意嘢 XD」
 
我：「好悶呀，啲攤位遊戲又唔好玩，個免費爆谷又難食。如果我係街外人入到嚟我哋學校參觀，我一定會好失望囉」
 
覆完阿盈我就㩒咗入同Anson嘅對話。
 
Anson：「我諗你都知……