《再見了，還會再見嗎？》: 第62章 – 四人約會（下）

有嚟開果然係唔同啲……
 
對於從來都唔嚟做運動嘅我，真係完全唔熟路。
 
甚至連呢到原來有𨋢搭我都唔知……
 
上到球場嗰層，一出𨋢就已經望到Anson同Choco。
 
「又幾快喎你哋〜」Anson對我哋講。
 




「唔通人哋會好似你咁成日遲到？」Choco望一望Anson然後講。
 
「開波啦，咁多嘢講」阿盈攞起咗地下嘅羽毛球拍打向對面。
 
見到個波飛緊過對面場，我即刻執起地下嘅另一支球拍準備還撃。
 
話咁快就已經打咗2個鐘，又係時候要交場。
 
「呼，好攰啊」我自言自語。
 




「你打咗唔係好多下咋喎〜」Anson聽到之後回應我。
 
「體諒下人哋真係咁難咩？」Choco出聲。
 
「唔係……」
 
「唔好鬧交啦，有咩好嘈啫，係車仔少做運動咋嘛」阿盈跟住挨咗落我到。
 
「唔好挨啦……咁多汗……」
 




「你唔鍾意丫？」阿盈扁起個嘴同我雙眼對望。
 
「點會喎〜」我伸出雙手大力攬返住阿盈。
 
「喂呀〜〜」
 
「好心你兩個就唔好咁痴纏啦，公眾地方嚟㗎……」Choco講完嘆一嘆氣。
 
「你理得我哋啫〜」阿盈繞住我手臂講。
 
「唉，服咗你哋……」
 
「上面好似有緩跑徑，不如上去睇下囉？」Choco問我哋。
 
唔係嘛……竟然仲要去跑步……




 
羽毛球我都叫做曾經小學係校隊，所以打到幾下。
 
覺得我係校隊好似好勁咁？
 
但其實我都係識正正常常咁搓下波㗎咋。
 
你哋都唔係唔知㗎啦，小學嗰啲校隊都係流流地，類似興趣班咁㗎啫。
 
不過都起碼叫做係應付到嘅運動。
 
跑步呢家嘢，我就真係搞唔掂喇。
 
平時好日都唔行下，唔好話跑啦，連急步行都就快喘晒氣。
 




拖住我嘅阿盈見到我面有難色，於是代我出聲。
 
阿盈：「車仔唔想跑啊，我哋上去休息啦」
 
Choco：「咁渣㗎〜」
 
阿盈：「你哋想跑咪自己跑囉，我哋坐低等你哋都冇所謂」
 
Choco：「咁又唔好，難得約到齊4個人出嚟。不如上去緩跑徑旁邊啲長櫈坐低抖下傾下偈啦」
 
跟住我哋就上咗去最頂嗰層。
 
一出𨋢就已經望到條緩跑徑。
 
原來而家已經發展到會有得喺冷氣環境入面跑步，我仲以為一定要喺公園或者運動場嗰啲添。




 
「坐嗰邊啦〜」Anson指住落地玻璃嗰邊講。
 
我哋4個一字排開咁坐喺長櫈，面向街外。
 
「車仔，你估下我屋企係邊座？」阿盈問我。
 
係喎，唔講都唔記得，呢到可以望到阿盈住嗰個屋苑。
 
「係咪橙色嗰楝啊？」
 
「嗰邊楝楝都橙色㗎啦，玩嘢咩」阿盈meet一meet我。
 
「唔係啊，我話嗰楝啊」我指一指嗰個方向。
 




「唉，我都唔係住嗰邊，叫你接我就死緊啦」
 
「我點知喎……平時都唔會入嚟呢邊嘅我」
 
「唔理呀，你要自己行熟佢，然後遲啲嚟屋企樓下接我啊」阿盈側一側頭挨住我。
 
唔係嘛……
 
呢個任務對我嚟講真係有啲難度……
 
「盡量啦……」
 
「冇得盡量呀〜 係一定要〜」
 
「好啦好啦……」
 
結果成個晏晝就坐咗喺到傾閒偈。
 
雖然除咗傾偈之外就乜都冇做過，但係可以有個weekend咁樣休息下都幾舒服。
 
希望之後都可以有多啲呢啲休息嘅日子啦。
 
走嘅時候我送阿盈返屋企。
 
「唔知係咪我錯覺，Anson同Choco嘅關係好似冇以前咁好嘅？」我問阿盈。
 
我覺得佢哋又唔係分咗手面阻阻咁嘅，但硬係好似有啲唔夾咁啫。
 
「乖，唔好問咁多啦，你要知嘅時候就會知㗎喇。」阿盈摸一摸我個頭。
 
「我上去喇，星期一見啦〜」
 
「咁好啦……」我回應。
 
唔知到底係咩事呢？？？