《再見了，還會再見嗎？》: 第54章 – 虛名

一如既往啦，喺聖誕假期後迎接我哋嘅就係第一學期嘅考試。

今次考試不過不失，都考到自己滿意嘅水平。

雖然轉咗過嚟就冇得再拎班第一，

呀！！唔好話第一，係頭十都冇。

其實可以喺呢班拎到中上游嘅名次，我已經覺得好開心㗎喇。





話晒呢到嘅班名次同級名次都唔係差好遠，只係加埋另一班精英班一齊做比較咋嘛。

當中最滿意就緊係數學啦，終於攞到第一次科嘅全級第一喇。

雖然呢啲名銜都只係虛榮嚟，但係真係好激勵到我個奮鬥心，想下學期都繼續努力拎多次科第一。

我諗科第一都算得上係一大進步掛，希望之後都可住keep住拎啦。

諗返之前陳sir對我講嘅嘢，話去到精英班個學習氣氛都唔同晒，真係自自然然就會去温習。





自己體驗過先知一般班同精英班係可以有幾唔同。

仲要好多都係差唔多類型嘅人，唔會話真係好難相處，但起碼唔會有好似以前嗰啲欺凌事件先啦。

「車仔，考成點啊〜」阿盈行咗過嚟問我。

「多得你教我囉，科世史全級第8啊〜」我將張成績表同阿盈交換嚟睇。

「叻仔喎，仲以為你得數學同科學叻㗎添〜」阿盈拎住我將成績表一邊睇一邊笑。





咁睇我㗎……

「咩喎，得2科叻又邊夠入到嚟呢班！！」

我仔細望下阿盈啲成績。

係咪痴線㗎……

全級第三。

英文同世史都全級第一，係科數學就得一百幾名。

又會剩係得一科缺陷咁癲嘅。

遲啲真係要幫下佢先得。





「車仔，陳sir揾你啊〜」阿天喺班房門口叫我。

聽到係陳sir揾，就緊係即刻出去啦。

我諗陳sir揾我嘅原因，應該一係數學，一係改進計劃㗎啫。

「陳sir〜」

「好耐冇見喇車仔，恭喜晒你數學級第一先〜」

我尷尬地掃一掃自己個頭。

「講返正經嘢先，今次揾你係想話你知個缺點已經幫你取消咗喇」陳sir將一張仲熱嘅中二下學期成績表遞俾我。





「你睇下有冇其他問題。如果冇嘅話，喺張form揾返自己個名，然後隔離簽返就得」

我諗應該都冇㗎啦，都係得嗰個位要改啫。

睇一睇張新成績表，優點/缺點嗰欄乜都冇寫，ok啦。

我拎起張form揭咗去第二頁揾返中二嘅改進計劃。

原來Lily同Parco都已經簽咗。

都好耐冇見過佢哋，遲啲叫佢哋食個飯先，話晒都係朋友嚟。

我好快咁簽返個名，再遞返張嘢俾陳sir。

「車仔，今日放學之後再見啦〜」





吓，咩放學之後見，點解我唔知陳sir講緊乜。

係咪我啱啱聽漏咗啲咩呢？

坐返埋位後，我仔細咁諗。

但係我又好似冇聽漏嘢喎。

「叫名嘅幾位同學而家出一出嚟啊，羅巧盈，張轟浩，……」班主任Miss Wong喺老師枱到叫我哋。

我同阿盈，仲有幾個都有被叫名嘅同學行咗出去。

「你哋應該都拎慣㗎喇，不過我都循例講一次啦。今日放學之後記得去禮堂做早會頒獎典禮個綵排啊。去到揾陳sir點名，佢會講詳情俾你哋知㗎喇」





乜又係你啊陳sir……

點解好似咩雜務都係佢做咁嘅？？

又係我哋級嘅訓導主任，又要搞改進計劃，又要負責頒獎典禮綵排，仲有好多好多……

乜學校真係咁缺老師咩。

算喇，作為學生都係唔好理同唔好問咁多。

「車仔，綵排完我想去食糖水丫」阿盈企喺我個位隔離講。

「到時去囉，反正綵排完又冇咩做〜」

「唔准偷偷地綵排完自己放學㗎〜」阿盈輕輕力meet住我塊面講。

「我同你一齊去綵排㗎喎，點會偷偷地走咗啊」

「咁我食飯再過嚟揾你啦」

「今日唔好理佢哋，我哋兩個人自私食啦」阿盈喺我耳邊細細聲講。

阿盈喺我耳邊細細聲講嘢嗰陣，好似喺我耳仔吹緊氣咁。

搞到我成身都起晒雞皮。

「哦，好呀……」

小息嗰陣，小雲無啦啦拎轉頭問我嘢。