《再見了，還會再見嗎？》: 第50章 – 除夕之約

我哋比原定時間遲咗10分鐘到。

原本仲以為由尖東站行去科學館附近間Neway會好近，但估唔到竟然會喺附近盪失路。

入到去嘅時候，發現好似大家都已經到齊。

「喂，解釋下點解你哋兩個會一齊遲到先〜」Anson質問我哋。

「我哋啱啱喺附近撞到咋嘛〜 我行過嚟嗰陣發現有個人盪失路喎，咁咪順便帶埋佢上嚟囉〜」





阿盈講大話嘅技術都真係幾高超……

「係咪真㗎〜 唔好一齊咗都唔話俾我哋知喎〜」Anson再問我哋。

「唔好逼佢哋答啦〜 你哋想唱咩歌啊，等我幫大家點返幾首啦」阿天坐喺個點唱屏幕前面問。

「點首死性不改嚟俾我唱下啦」坐喺入少少嘅Simon對阿天講。

「又唱埋啲mk歌……」阿天回應佢。





「幫我點首男孩像你〜」小雲都對阿天講。

「仲有冇人點呀？冇我就亂咁幫大家㩒啲熱播榜㗎喇〜」雯雯對所有人講。

因為冇咩人有揀歌，所以首“死性不改”一點就即播。

「人天生根本都不可以愛死身邊的一個〜」Simon一直唱。

首歌Simon都揀得幾啱佢自己，啲內容直頭同佢一樣。





之前聽就聽得多啲人話佢成日識女仔。

不過就我自己所見，又好似唔太見佢話有拖拍？

人哋啲私事我都係唔好諗太多，連自己我都未顧得掂。

「喂，一齊唱啦，得我自己一個唱邊好玩㗎」Simon揸住支咪講。

「我確信 天真不會錯 威力會移山填海〜」坐喺Simon旁邊嘅小雲拎起咗支咪唱。

到首歌唱完，都只係得佢兩個唱過。

小雲：「做咩你哋全部都唔唱㗎〜」

Choco：「見你哋兩個合唱喎〜 我哋點敢阻住啊〜」





全場一陣歡呼聲。

好似得我一個唔知發生咩事？

講開又講，其實我知佢哋原本一直都有個group，直到最近好似加咗小雲入去。

佢哋個group有咩秘密我就唔知啦，我諗我應該係在場唯一一個冇入嗰個group嘅人。

但係我又冇理由主動叫人add我入去咁尷尬啫。

所以都係當唔知，然後笑下帶過就算啦。

「呢首水瓶座邊個點㗎，認領返好喎〜」阿天問我哋。





「我嘅我嘅〜」

跟住嘅時間我哋都係輪流唱下歌啊，傾下偈啊，開開心心咁就過咗一晚。

到咗大概11:45，我哋就離開咗K房，行返出海旁。

Anson：「估唔到會咁多人喺到喎，點倒數呀……」

Choco：「你估附近有冇個可以望到海嘅高啲嘅地方呢？」

阿盈：「我前排嚟嗰陣見過嗰邊好似有個平台花園，不如我哋行過去睇下啦」

我：「我都有去過嗰到啊，我諗應該唔係好多人㗎啫」

Anson：「咁就要你兩個幫手帶路喇，行啦〜」





行緊過去嘅時候阿盈問我，

「你啱啱做咩出聲啊？如果俾人知得我同你識去，咪會俾人懷疑囉……」阿盈細細聲同我講。

係喎，明明都已經有人識行，我扮唔識都得啦。

「Sorry囉……」

「咁又唔使sorry，佢哋又冇人懷疑我哋」

「到喇〜」阿盈對後面所有人講。

阿天：「嘩，呢到又真係唔錯喎。人就唔係話特別少，不過同下面比都算幾鬆動，而且勝在個景夠開揚」





雯雯：「sell緊樓咩你而家，做咩啫你」

阿天：「唓，搞下笑都唔得」

Simon：「仲有1分鐘就12點喇，有咩今年未做嘅願望好做埋佢喇」

小雲：「得嗰1分鐘，完成得啲咩願望啫」

我：「我希望……下年嘅今日，大家會齊人出嚟再倒數」

Anson：「容乜易啫，打個電話send個message，大家仆都仆出嚟啦」

Choco：「咪係囉，叫到嘅話我都一定會嚟」

而家喺到講話下年再出嚟，講就易啫。

到咗一年後，乜真係仲有人會記得個約定咩？